थार ५ डोर अर्माडा नामले आउने चर्चा

महिन्द्राले आफ्नो चर्चित अफरोडर एसयूभी थारलाई नयाँ संस्करणमा उतार्न धेरै ट्रेडमार्कहरू दर्ता गरेको छ । जसलाई कम्पनीले निकट भविष्यमा आउने तयारी भएको थार ५ डोरको लागि प्रयोग गर्न सकिने चर्चा चलेको छ ।

मिडिया रिपोर्टका अनुसार महिन्द्राले ७ वटा नेम ट्यागका लागि आवेदन दिएको छ । जसमा थार आर्माडा, थार सेन्चुरियन, थार कल्ट, थार ग्लाडियस, थार रेक्स, थार रोक्स र थार सवाना रहेका छन् ।

५ डोर एसयूभी र डवल क्याब पिकअपमा उपलब्ध अर्माडालाई महिन्द्राले सन् १९९३ मा लन्च गरेर २००१ मा बन्द गरेको थियो । सोही नामलाई कम्पनीले थार ५–डोरमार्फत पुनर्जिवित गर्न लागेको आँकलन गरिएको छ । जसबारे कम्पनीले औपचारिक जानकारी भने गराइसकेको छैन ।

थार ५ डोरको डिजाइन अर्माडासँग मिल्दोजुल्दो समेत देखिएका कारण यस्तो आँकलन गरिएको हो । सो एसयूभी लामो बोनेट र चौडा फ्रन्ट फेन्डरसहितको ५ वटा ढोकामा आउने तयारी भइरहेको छ ।

हाल उपलब्ध ४ डोर संस्करणकै इन्जिन अप्सनमा उपलब्ध हुने सो नयाँ संस्करणमा १३० बीएचपी पावर र ३०० एनएम टर्क उत्पादन गर्ने २.२–लिटर डिजेल इन्जिन तथा १५० बीएचपी पावर र ३२० एनएम टर्क उत्पादन गर्ने २.०–लिटर पेट्रोल इन्जिनले निरन्तरता पाउनेछ । दुवै इन्जिन ६ स्पीड म्यानुअल र ६ स्पीड अटोमेटिक ट्रान्समिसनमा उपलब्ध हुने सम्भावना छ ।