बीवाईडी ब्लेड ब्याट्रीयुक्त टेस्ला मोडल वाई सार्वजनिक

बीवाईडीको एलएफटी ब्याट्रीबाट चल्ने पहिलो टेस्ला मोडल जर्मनीको बर्लिनस्थित गिगाफ्याक्ट्रीमा सार्वजनिक गरिएको छ । चाइनिज ब्रान्डको ब्याट्री प्रयोग गरिएको यो टेस्लाको पहिलो इलेक्ट्रिक कार हो ।

अझ रोचक पक्ष के छ भने यसले १५ मिनेटमा प्राप्त गर्ने चार्जिङ क्षमता समेत ६० प्रतिशतले बढेको छ ।

गत मे ४ मा जर्मन मिडियाहरुले यी दुई कम्पनी बीच सहकार्य सुरुवात हुने घोषणा गरेका थिए । यो भन्दा पहिले बीवाईडी र टेस्ला दुई प्रतिस्पर्धी कम्पनी भएकाले एक अर्कामा सहयोग हुने कुरा कसैले सोचेको समेत थिएन । यद्यपि यस्ता समाचार भने आइरहन्थे ।

मे महिनामा टेस्लाको मोडल वाई उत्पादन हुन थालेको र यसमा बीवाईडीको एलएफपी ब्लेड ब्याट्री प्रयोग हुने बताइएको थियो । त्यसपछि अहिले पहिलो मोडल सार्वजनिक भएको हो ।

जर्मन मिडियाका अनुसार गत मे २० मा टेस्ला बर्लिन प्लान्टमा यसलाई सार्वजनिक गरिएको हो । यद्यपि यो प्रोडक्सन मोडल नभई प्रोटोटाइप मात्र हो । यो एक इन्ट्री लेवल इलेक्ट्रिक कार हुनेछ, जसमा ५५ किलोवाट आवरको एलएफपी ब्याट्री प्रयोग गरिएको छ र सिंगल चार्जमा ४४० किलोमिटर रेन्ज दिन्छ ।

बीवाईडी र टेस्लाको सम्बन्ध जहिले पनि शंकास्पद रहने गरेको थियो । उनीहरुले औपचारिक रुपमा कहिल्यै पनि यसरी सहकार्य हुन लागेको बताएका थिएनन् । यी दुवै कम्पनी विश्वकै सबैभन्दा ठूला न्यु इनर्जी भेइकल कम्पनी हुन्, जसको प्रतिस्पर्धा भइरहेको छ ।

स्मरणिय के छ भने बीवाईडीको सहायक कम्पनी फिनड्रिम्सले आफ्नै इनहाउस ब्याट्रीको रुपमा ब्लेड ब्याट्रीको विकास र उत्पादन गर्दै आएको छ, जुन विश्वमै नौलो प्रविधि र क्षमतायुक्त ब्याट्री मानिन्छ ।