टेस्ला मोडल थ्रीको सस्तो भर्सन कोरियामा लन्च, रेन्ज र फिचरमा ब्यापक कटौती

टेस्लाले दक्षिण कोरियामा मोडेल थ्रीको सस्तो भर्सन लन्च गरेको छ । इन्ट्रि लेभल सो ईभीको मूल्य २८ हजार ३०० डलर निर्धारण गरिएको छ । जुन टेस्लाले कोरियामा यसअघि बिक्री गर्दै आएको मोडल थ्रीको तुलनामा ७ हजार १०० डलर कम हो ।

फिचर र रेन्ज घटाएर बिक्री थालिएको यस भर्सनको आगमनले आगमी दिनमा टेस्लाले एसियाली बजारलाई लक्षित गरी छुट्टै नयाँ भर्सन लन्च गर्ने रणनितीलाई प्रतिविम्वित गरेको जनाइएको छ ।

कम्पनीले यसअघि दक्षिण कोरियामा लामो रेन्ज भएको रियर–ह्वील ड्राइभ संस्करण बिक्री गर्दै आएको थियो । चिनस्थित टेस्लाको सांघाई गिगाफ्याक्ट्रीमा निर्माण गरिएको सो नयाँ भर्सन छिट्टै चीनमा समेत लन्च हुने अनुमान गरिएको छ । चीनमा यसको मूल्य २४ हजार ३०० डलर निर्धारण हुने अपेक्षा गरिएको छ ।

टेस्लाले कोरियामा लन्च गरेको सो नयाँ भर्सनको रेन्ज जम्मा ३८२ किलोमिटर रहने दाबी गरिएको छ । जवकी यसको स्ट्यान्डर्ड संस्करणको रेन्ज ५८३ किलोमिटर थियो । त्यसैगरी, स्ट्यान्डर्ड भेरिएन्टले शून्यदेखी १०० किलोमिटरसम्मको गति लिन ५.२ सेकेन्ड समय लाग्नेमा अब बढेर ६.२ सेकेन्ड लिने भएको छ ।

त्यसैगरी, क्याबिनमा यसअघि लेदरले वेरिएको अपहोलेष्ट्रि राखिएकोमा सो सस्तो भेरिएन्टमा कपडाको अपहोलेस्ट्रि दिइएको छ । अगाडिको इन्फोटेनमेन्ट सिस्टमले रेडियो फंक्सन गुमाएको छ भने स्टेयरिङ ह्वील र अगाडिको सिट पावरमा समेत परिमार्जन गरिएको छ । सस्तो भर्सनमा अव सिटलाई हातैले समायोजन गर्नुपर्नेछ ।

साथै, अगाडिको सिटमा हिटिङ सिस्टम दिइएपनि भेन्टिलेसन भने हटाइएको छ । पछाडीको सिटमा हिटिङ सिस्टम पूर्ण रूपमा हटाइएको छ ।