परीक्षणको क्रममा देखिएको टेस्ला साइबरट्रक कहिले होला लन्च

इलेक्ट्रिक भेइकल कम्पनी टेस्लाको साइबरट्रक परीक्षणको क्रममा देखिएको छ । लामो समयदेखि बहुप्रतीक्षित साइबरट्रकको उत्पादन २०२३ मा सुरु गर्ने लक्ष्य राखेको कम्पनीले जानकारी दिएको छ ।

टेस्लाका सीईओ एलन मस्कले यो वर्ष उक्त फ्युचरिस्टिक पिकअपको उत्पादन र डेलिभरीको अपेक्षा नगर्न अनुरोध गरेका छन् । मस्कले साइबरट्रक सेमी र रोडस्टरको उत्पादनमा तयारी भइरहेको बताएका छन् ।

टेस्लाको नयाँ गाडी साइबरट्रक २०२२ मा उत्पादन हुने अपेक्षा गरिएको थियो । यद्यपि हाल कम्पनीले साइबरट्रकको उत्पादन मिति आफ्नो वेबसाइटबाट हटाएको छ ।

साइबरट्रक सुरुमा २०१९ मा घोषणा गरिएको थियो । अगस्ट २०२१ पश्चात साइबरट्रकको उत्पादन मिति २०२२ मा सारिएको थियो, किनभने कम्पनीले त्यो समयमा मोडल वाईको उत्पादनमा ध्यान केन्द्रित गर्ने निर्णय गरेको थियो ।