टेस्लाले चीनबाट बन्द गर्यो स्पेयर पार्ट्सको आयात, यी २ मोडलको उत्पादन प्रभावित हुने

अमेरिकी राष्ट्रपति ट्रम्पले चिनियाँ सामानको आयातमा १४५ प्रतिशत कर बढाएपछि टेस्लाले चीनबाट आफ्नो साइबरक्याब र सेमि–ट्रकको पार्टपुर्जाको आयात रोकेको छ । दुई देशबीच चलिरहेको व्यापार युद्धको बीचमा यो खबर आएको हो ।

यो कदमले साइबरक्याव र सेमि–ट्रकको ठूलो मात्रामा उत्पादन गर्ने टेस्लाको योजनालाई असर गर्न सक्ने अनुमान गरिएको छ । टेस्लाले आगामी महिनाहरूमा कम्पोनेन्ट ढुवानीहरू प्राप्त गर्न सुरु गर्ने अपेक्षा गरिरहेको थियो ।

दुई मोडलको परीक्षण उत्पादन यस वर्ष अक्टोबरमा सुरु हुने तय गरिएको थियो, त्यसपछि २०२६ मा ठूलो मात्रामा उत्पादन हुने भनिएको थियो । साइबरक्याब टेक्सास र सेमी नेभाडामा उत्पादन हुने टेस्लाको भनाई छ ।

मिडिया रिपोर्टका अनुसार टेस्लाले विगत दुई वर्षदेखि चीनमा सम्भावित अमेरिकी करलाई ध्यानमा राख्दै आफ्ना अमेरिकी प्लान्टमा उत्तरी अमेरिकाबाट प्राप्त हुने पार्टपुर्जाको अनुपात बढाउँदै आएको छ ।
यस हप्ताको सुरुमा, ट्रम्पले मेक्सिको, क्यानडा र अन्य ठाउँहरूबाट विदेशी कार र स्पेयर पार्ट्सको आयातमा लगाइएको २५ प्रतिशत करमा परिवर्तन गर्ने विचार गरिरहेको बताएका थिए ।

टेस्लाले साइबरक्याब फ्लीटको साथ रोबोट्याक्सी सेवा सुरु गर्ने योजना समेत बनाएको छ । ईभी निर्माताले २०२६ मा सेमी इलेक्ट्रिक ट्रकहरूको उत्पादन बढाउने र पेप्सी लगायतका ग्राहकहरूलाई लामो समयदेखि बाँकी रहेका अर्डरहरूको डेलिभरीलाई तीव्र बनाउने योजना पनि बनाएको छ ।

टेस्लाको प्रमुख व्यापार योजनामा ​​परेको प्रभावले ट्रम्पको करले मस्कलाई कसरी हानि पु-याएको छ भनेर देखाउँछ, यद्यपि यो अमेरिकी स्थानीय उत्पादनलाई बढावा दिनको लागि हो । अहिले, ढुवानी निलम्बन कति समयसम्म रहनेछ भन्ने कुरा स्पष्ट छैन।

चीनले अमेरिकी सामानहरूमा प्रतिशोधात्मक १२५ प्रतिशत कर लगाएपछि टेस्लाले मोडेल एस र मोडेल एक्सको लागि नयाँ अर्डर लिन पनि बन्द गरेको छ ।