टेस्लाको फुल सेल्फ ड्राइभिङ सफ्टवेयर चीनमा लन्च हुने, चिनियाँ कम्पनी बाइडुसँग सम्झौता

टेस्लाले ४ वर्षअघि आफ्नो अटोपाइलट सफ्टवेयरको सबैभन्दा अटोनोमस भर्सन एफएसडी लन्च गरेको थियो । अब टेस्लाको फुल सेल्फ ड्राइभिङ (एफएसडी) सफ्टवेयर चीनमा पनि चाँडै लन्च हुने भएको छ ।

रिपोर्टका अनुसार मस्कले आफ्नो चीन भ्रमणका क्रममा टेस्लाको ड्राइभर असिस्टेन्स सिस्टमलाई विश्वको सबैभन्दा ठूलो अटो बजारमा पेश गर्ने अनुमति पाएका छन् । टेस्लाले म्यापिङ र नेभिगेसन कार्यका लागि चिनियाँ प्रविधि कम्पनी बाइडु इंकसँग सम्झौता गरेको छ ।

रिपोर्टका अनुसार टेस्ला र बाइडु दुबै कम्पनीले चाँडै नै चीनमा ईभीको एफएसडी सर्भिसेजको लागि म्यापिङ र नेभिगेसन कार्यमा सँगै काम गर्न थाल्नेछन् । यस साझेदारीले टेस्लालाई बाइडु लेन लेवल नेभिगेसन र म्यापिङ सर्भिसेज प्रयोग गरेर चीनमा आफ्नो सेल्फ ड्राइभिङ सेवा सुरु गर्न मद्दत गर्नेछ ।

बाइडुले टेस्लालाई आफ्नो लेन लेवल नेभिगेसन सिस्टम आपूर्ति गर्नेछ । चीनमा टेस्लाले सार्वजनिक सडकमा ड्राइभिङ गर्नु अघि इन्टेलिजेन्ट ड्राइभिङ सिस्टमको लागि म्यापिङ योग्यता प्राप्त गर्नु पर्नेछ । साथै विदेशी कम्पनीले आवश्यक लाइसेन्स दिने स्थानीय फर्मसँग पनि सहकार्य गर्नु पर्नेछ ।

टेस्लाले २०२० मा बाइडुसँग साझेदारी गरेको थियो । अब दुवै कम्पनीले यो सम्झौतासँगै आफ्नो साझेदारीलाई थप मजबुत बनाउन थालेका छन् । यद्यपि यस सम्झौताको बारेमा टेस्ला र बाइडु दुबै कम्पनीबाट अहिलेसम्म कुनै औपचारिक जानकारी भने आएको छैन ।