यस्तो हुनेछ ओलाको पहिलो इलेक्ट्रिक कार

ओलाले आफ्नो पहिलो इलेक्ट्रिक कार ल्याउने भएको छ । कम्पनीले सो कारको पहिलो लुक सार्वजनिक गरेको छ । यसअघि कम्पनीले ओला इलेक्ट्रिक स्कुटर ल्याएको थियो । रिपोर्टका अनुसार यो सेडान सेग्मेन्टको इलेक्ट्रिक कार हुनेछ ।

टिपस्टर अभिषेक यादवले आफ्नो ट्विटर एकाउन्टमा ओला इलेक्ट्रिक कारका केही तस्बिर सेयर गरेका छन् । तमिलनाडुको ओला फ्युचर फ्याक्ट्रीमा कम्पनीका सीईओ भाविश अग्रवालले इलेक्ट्रिक कारको टिजर भिडियो जारी गरेका थिए ।

टिजर भिडियो अनुसार कारमा फ्युचरिस्टिक डिजाइन दिइएको छ । यसको अगाडिदेखि पछाडिसम्म एलईडी लाइट जडान गरिएको छ । टिजरमा कारलाई रातो कलरमा प्रस्तुत गरिएको छ । ओला इलेक्ट्रिक कारमा स्लिक एलईडी हेडल्याम्प, स्लोपी विन्डशिल्ड र स्पोर्टी अलोय ह्विल समावेश गरिएको छ ।

केही दिन पहिले कम्पनीका सीईओले कम्पनीको पहिलो इलेक्ट्रिक कार लन्च गर्ने जानकारी दिएका थिए । यस क्रममा उनले कम्पनीले करिब ६ महिनादेखि अटोनोमस गाडीको परीक्षण गरिरहेको बताए । यो कार विश्व बजारमा आउन २ वर्ष लाग्न सक्छ । कम्पनीले सो कारको मूल्य १० लाख भन्दा कम हुने जानकारी दिएको छ ।