कन्भर्सन किट जडित टाटा सफारी इलेक्ट्रिक भर्सनमा आउँदै

टाटाको प्रमुख प्यासेन्जर कार टाटा सफारी अब इलेक्ट्रिक भर्सनमा लन्च गरिने भएको छ । हालै भारतको राजस्थानमा सो एसयूभी परीक्षणको समयमा देखिएको थियो । कम्पनीले टाटा सफारी इलेक्ट्रिक भर्सनमा लन्च गरेमा निकै रोचक हुने अनुमान गरिएको छ । कम्पनीले अल्ट्रोज ईभी र पन्च ईभी पनि छिट्टै भारतमा लन्च गर्ने सम्भावना छ ।

यद्यपि रिपोर्टका अनुसार टाटा सफारी टाटा मोटर्सको प्रोटोटाइप भने होइन । यो विशेष मोडेल नियमित २०२१ टाटा सफारी एक्सजेडए प्लस हो, जसमा पावरका लागि २.० लिटर टर्बो डिजेल इन्जिन जडान गरिएको छ । यसमा हरियो रङको नम्बर प्लेट जोडिएको छ । नयाँ सफारीमा इलेक्ट्रिक कन्भर्सन किटलाई प्रयोग गर्न सकिन्छ ।

यो किट विकासको चरणमा छ वा व्यावसायिक रूपमा स्वीकृत भइसकेको छ भन्ने अहिलेसम्म थाहा हुन सकेको छैन । हाल ईभी कन्भर्सन किट निकै लोकप्रिय छ । गोगोए१ र नर्थवे मोटरस्पोर्टस् जस्ता कम्पनीले केही दुई पाङ्ग्रे सवारी साधन, यात्रुवाहक कार र व्यावसायिक सवारी साधनमा ईभी कन्भर्सन किट प्रयोग गरिरहेको छ ।

प्रिमियम एसयूभीको लागि ईभी कन्भर्सन किट प्रयोग गर्नु एक स्मार्ट विकल्प हुनेछ । तर, यो ईभी कन्भर्सन किटको विकास गर्नु एकदमै महँगो प्रक्रिया हो ।

नयाँ सफारीको डिजाइनमा कुनै परिवर्तन गरिएको छैन । यो टाटाको आफ्नै परीक्षण मोडल जस्तो देखिदैन किनकि यसमा रातो नम्बर प्लेट प्रयोग गरिएको छैन ।