नेक्सन ईभी फेरि बन्ला हट सेलर ?

टाटा नेक्सन ईभी कुनै बेला नेपाली बजारमा धेरै माग गरिएको ईभी थियो । टाटा मोटर्सको नेपालका लागि आधिकारिक वितरक सिप्रदी ट्रेडिङ प्रालिले नेपाली बजारमा समेत सो ईभी भित्र्याएर चर्चा बटुलेको थियो ।

नेपालमा समेत कुनै समयमा टाटा नेक्सन ईभीको डेलिभरी पाउन समेत लामो समय कुर्नु पर्ने अवस्था थियो । करिव एक वर्ष पश्चात मात्र ग्राहकले डेलिभरी पाउन सक्ने अवस्था समेत थियो । नेपाली बजारमा समेत यसको माग निरन्तर रुपमा बढिरहेको र माग अनुसार नेपाली बजारमा उपलब्ध गराउन नसकेको कारण सो अवस्था आएको थियो । नेपाल वाहेक भारतका साथै अन्य बजारमा समेत गाडी उपलब्ध गराउनु पर्ने भएकाले माग अनुसार उत्पादन हुन नसक्नु स्वाभाविक थियो ।

सब कम्प्याक्ट एसयूभी नेक्सन ईभीको सबैभन्दा आकर्षक फिचर भनेको यसको २०५ एमएमको उच्चतम ग्राउन्ड क्लियरेन्स हो । जुन नेपाली सडकका लागि उपयुक्त छ । त्यसैगरी यसमा टाटाको जिपट्रोन प्लेटफर्ममा बनेको ३०.२ किलोवाट आवर क्षमताको लिथियम आयोन ब्याट्री जडान गरिएको छ । यसमा ९५ किलोवाट क्षमताको इलेक्ट्रिक मोटर दिइएको छ । एक पटकको फुल चार्जमा ३ सय किलोमिटर हाराहारी यात्रा गर्न सकिने विशेषताका कारण समेत यो एसयूभीको चर्चा चुलिंदो छ ।

अत्याधुनिक जिपट्रोन प्रविधियुक्त नेक्सन ईभीको बनावट आकर्षक छ भने यसमा अन्त्यन्त सुरक्षित एवं आरामदायी तवरले यात्रा गर्न सकिन्छ । त्यसैगरि लामो दुरीको यात्रा पनि सहजताका साथ गर्न सकिने नेक्सनको ब्याट्रीको आयु लामो हुनुको साथै यसलाई आफ्नै घरमा चार्ज गर्न सकिन्छ ।

सन् २०२० को जनवरीबाट भारतमा विक्री वितरण सुरु भएको नेक्सन ईभीले छोटो अवधिमा नै भारतीय इलेक्ट्रिक गाडीको बजारको ६५ प्रतिशत हिस्सा ओगटेको थियो । नेपाली बजारमा सो एसयूभी २०७८ साउनमा सार्वजनिक गरिएको थियो र त्यसको केही समय पछि बिक्री प्रारम्भ भएको थियो ।

टाटा मोटर्सले त्यसपछि नेपाली बजारमा टाटा टियागो ईभी उपलब्ध गरायो भने हालै भित्र्याएको टाटा पन्च ईभीको चर्चा बढ्दो छ । यो अवस्थामा नेक्सन ईभी भन्दा कम मूल्यका यी ईभीले चर्चा पाएका छन् । यसकारण हाल नेपाली बजारमा सिप्रदीले टाटा नेक्सन ईभी म्याक्स मात्र बिक्रीका लागि वेबसाइटमा राखेको छ ।

तर हालै नेक्सन ईभी अपग्रेड भएर आउने समाचारले फेरि धेरैको ध्यान खिचेको छ । नेक्सन ईभी अब नयाँ ४५ किलोवाट आवरको ब्याट्री प्याकमा उपलब्ध हुने भएको छ । यस अघि ३० र ३५ किलोवाट आवरको ब्याट्री प्याक उपलब्ध थियो ।

टाटाले पहिलो पटक नेक्सन ईभीमा पानारोमिक सनरुफको प्रयोग गरेको छ । टाटाले ब्याट्री र फिचर थप गरेर ल्याएको नेक्सन ईभीको मूल्य भारतमा ६० हजारले घटाएको हो ।

टाटा मोटर्सका अनुसार नयाँ ब्याट्रीमा यसअघिको तुलनामा १५ प्रतिशत बढी इनर्जी डेन्सीटी छ । साथै, फास्ट चार्जर सपोर्टको मामलामा पनि उत्कृष्ट छ । नयाँ ४५ किलोवाट आवरको ब्याट्रीलाई १० प्रतिशतबाट ८० प्रतिशतसम्म चार्ज गर्न केबल ४८ मिनेट लाग्नेछ ।

यसबाट आगामी दिनमा फेरि नेक्सन ईभी धेरैको रोजाइमा पर्ने अनुमान गर्न सकिन्छ ।