टाटाले पनि बढायो नेक्सन एसयुभीको मूल्य, १५ हजार भारुसम्म बृद्धि

टाटा मोटर्सले भारतमा आफ्नो लोकप्रिय एसयुभी नेक्सनमा मूल्य बृद्धि गरेको छ । नेक्सनको डिजेल र पेट्रोल दुबै मोडलमा मूल्य बृद्धि भएको हो । यो एसयुभीमा उसले १५ हजार भारुसम्म बृद्धि गरेको छ । सन् २०२१ को नोभेम्बर महिनामा समेत टाटाले यो एसयुभीमा मूल्य बृद्धि गरेको थियो ।

कम्पनीले पेट्रोल गाडीमा ५ हजारदेखी १३ हजार भारुसम्म र डिजेलमा ५ हजारदेखी १५ हजार भारुसम्म बृद्धि गरेको छ । सबैभन्दा बढी एक्सएम एस भेरियन्टमा १५ हजार भारुले मूल्य बृद्धि गरिएको हो ।

डिजेलमा कुल १८ र पेट्रोलमा २१ भेरियन्टमा उपलब्ध यो एसयुभीको मूल्य भारतमा ७ लाख ३९ हजारदेखी १३ लाख ३४ हजार रुपैयाँसम्म निर्धारण गरिएको छ । नेपाली बजारमा समेत निकै नै रुचाइएको यो एसयुभीको मूल्य ४० लाख ३० हजार रुपैयाँदेखी ५३ लाख ९० हजार रुपैयाँसम्म निर्धारण गरिएको छ ।

नेपालमा यसको पेट्रोल इन्जिनमा कुल ७ वटा भेरियन्ट मात्र उपलब्ध रहँदै आएको छ । नेपाली बजारमा नेक्सनको पेट्रोल मोडलमात्र उपलब्ध रहेका कारण आगामी दिनमा यो एसयुभीको मूल्य ५० हजार रुपैंयाँ हाराहारीसम्मले बृद्धि हुने देखिएको छ ।

भारतमा यसअघि मारुती सुजुकी, टोयोटा, फक्सवागन, हुन्डाई, महिन्द्रा, स्कोडा, एमजी र इसुजु लगायत ब्रान्डले आफ्ना कारको मूल्य बृद्धि गरिसकेका छन् भने बाँकी ब्रान्डले समेत केहि दिनभित्रै मूल्य बढाउने तयारी गरिरहेको जनाइएको छ ।