सुजुकीको स्पोर्टी स्कुटर एभेनिसको स्पेसल एडिसन

सुजुकीले आफ्नो लोकप्रिय स्पोर्टी स्कुटर एभेनिसको नयाँ स्पेसल एडिसन भारतीय बजारमा पेश गरेको छ। युवा पुस्ता र स्टाइल मन पराउने ग्राहकलाई लक्षित गर्दै ल्याइएको सो नयाँ संस्करणमा आकर्षक ड्युअल टोन रङ विकल्प समावेश गरिएको छ।

नयाँ एभेनिस स्कुटरले बजारमा रहेका अन्य स्पोर्टी स्कुटरहरूसँग कडा प्रतिस्पर्धा गर्ने अपेक्षा गरिएको छ। यसको मूल्य भारतीय बजारमा करिब १ लाख ३ हजार रुपैयाँदेखि सुरु भएर १ लाख ५ हजार रुपैयाँसम्म पुगेको छ।

नयाँ एभेनिसमा यसमा शार्प एलइडी हेडलाइट र टेललाइट, स्प्लिट ग्र्याब रेल र स्पोर्टी ग्राफिक्स जस्ता एलिमेन्ट समावेश छ । साथै साइड स्ट्यान्ड इन्टरलक सिस्टम, सिट नखोली बाहिरबाटै इन्धन भर्न सकिने सुविधा, ब्लुटुथ सपोर्ट भएको डिजिटल एलसिडी डिस्प्ले, टर्न बाय टर्न नेविगेसन, कल तथा एसएमएस अलर्ट, मोबाइल एप सपोर्ट, फ्रन्ट युएसबी चार्जिङ पोर्ट, सानो ग्लोभ बक्स र २१.८ लिटरको अन्डर–सिट स्टोरेज जस्ता फिचर उपलब्ध छ ।

ब्रेकिङको लागि फ्रन्टमा डिस्क ब्रेक र रियरमा ड्रम ब्रेकसहित कम्बाइन्ड ब्रेकिङ सिस्टम राखिएको छ भने यसमा अलोय ह्विल र ट्युबलेस टायर समावेश छ ।

यसमा १२४.३ सीसी क्षमताको फोर स्ट्रोक, सिंगल सिलिन्डर, एयर कूल्ड इन्जिन जडान गरिएको छ जसले ८.७ पावर र १० एनएमको टर्क उत्पादन गर्छ। यसमा अटोमेटिक गियर सिस्टम प्रयोग गरिएको छ । कम्पनीका अनुसार यसले प्रतिलिटर करिब ५० देखि ५५ किलोमिटरसम्म माइलेज दिन सक्छ।