सुजुकीको पहिलो इलेक्ट्रिक स्कुटर ई-एक्सेसको बुकिङ सुरु, मूल्य र फिचर सार्वजनिक

सुजुकीकाे पहिलो इलेक्ट्रिक स्कुटर सुजुकी ई-एक्सेसको बुकिङ भारतमा औपचारिक रूपमा सुरु भएको छ। यसको मूल्य १ लाख ८८ हजार ४९० भारु तोकिएको छ। साथै यसको बिक्री सुरु भएपछि यो स्कुटर अनलाइन प्लेटफर्म फ्लिपकार्टमार्फत पनि उपलब्ध हुनेछ।

सुजुकी ई-एक्सेस सुजुकी ई-टेक्नोलोजी अन्तर्गत विकास गरिएको हो । सो स्कुटरले पानीमा डुबाउने, अत्यधिक तापक्रम, भाइब्रेशन र ब्याट्री सेफ्टी टेस्ट परीक्षणमा मापदण्ड पूरा गरेको कम्पनीको दाबी छ। यसमा लिथियम आइरन फस्फेट प्रविधिको ब्याट्री प्रयोग गरिएको छ, जसले परम्परागत एनएमसी ब्याट्रीको तुलनामा चार गुणासम्म लामो आयु प्रदान गर्ने बताइएको छ।

सो इलेक्ट्रिक स्कुटर ४.१ किलोवाट क्षमताको मोटरबाट सञ्चालित छ, जसले १५ एनएम टर्क उत्पन्न गर्छ। यसमा इको, राइड ए र राइड बी गरी तीनवटा राइड मोड, रिभर्स मोड र रिजेनेरेटिभ ब्रेकिङ सुविधा दिइएको छ। सुजुकी ई-एक्सेसको उच्चतम गति ७१ किलोमिटर प्रतिघण्टा रहेको छ भने एकपटक चार्ज गर्दा ९५ किलोमिटर सम्मको दूरी तय गर्न सक्ने दाबी गरिएको छ।

हल्का तौलको च्यासिस र आल्मुनियम ब्याट्री केसले स्कुटरलाई राम्रो स्थिरता र सहज सवारी अनुभव प्रदान गर्छ। यसमा एलईडी लाइटिङ, टु–टोन अलोय ह्विल र मेन्टेनेन्स -फ्री ड्राइभ बेल्टजस्ता फिचर पनि उपलब्ध छ ।साथै कम्पनीले यसमा ७ वर्ष वा ८० हजार किलोमिटरसम्मको वारेन्टी पनि प्रदान गरेको छ ।