सुजुकी वागनआर फ्लेक्स–फ्युल एक महिनामा जम्मा ३ युनिट बिक्री, किन भयो फ्लप ?

मारुती सुजुकीको पहिलो फ्लेक्स फ्युल मोडल, ’वागनआर बायोफ्लेक्स’को बजार सुरुवात निकै सुस्त देखिएको छ । पर्यावरणमैत्री र वैकल्पिक इन्धन प्रयोग गर्ने उद्देश्यका साथ ल्याइएको यो ह्याचब्याक कारले सुरुवाती दिनमा ग्राहकहरूलाई आकर्षित गर्न सकेको छैन ।

कम्पनीले ई८५ इन्धन प्रयोग गर्न मिल्ने यस नयाँ मोडलको बिक्री सुरु गरेको एक महिनामा जम्मा ३ युनिट गाडी बेच्न सफल भएको छ । वागनआर बायोफ्लेक्स औपचारिक रूपमा जुन ४ मा सार्वजनिक गरिएको थियो ।

भारतीय गाडी दर्तासम्बन्धी सरकारी अनलाइन प्रणाली वाहनको पछिल्लो तथ्याङ्क अनुसार, जुन २९ सम्ममा यो कारका जम्मा ३ वटा युनिट मात्र दर्ता भएका छन् । यसले बजारमा यस प्रविधिको सुरुवात निकै चुनौतीपूर्ण रहेको देखाउँछ । भारतीय बजारमा वागनआर बायोफ्लेक्सको सुरुवाती मूल्य ७ लाख २४ हजार तोकिएको छ ।

यसमा परिमार्जित १.२ लिटर, ४ सिलिन्डर के१२एन इन्जिन जडान गरिएको छ । कम्पनीका अनुसार, यो इन्जिन ई२० (२०% इथानोल मिश्रित) देखि ई१०० (१००% शुद्ध इथानोल) सम्मका सबै प्रकारका इथानोल मिश्रित इन्धनहरूसँग चल्न सक्षम छ । यो कार शुद्ध इथानोलमा पनि चल्न सक्ने भए तापनि यसलाई विशेष गरी ई८५ इन्धनका लागि प्रमाणीकरण गरिएको छ ।

बजारमा ई८५ इन्धन सजिलै उपलब्ध नहुनु र गाडीको सञ्चालन र मर्मत खर्च सम्बन्धी ग्राहकहरूमा देखिएको अन्योलता जस्ता कारणले फ्लेक्स–फ्युल मोडलप्रति ग्राहक सकरात्मक वन्न सकिरहेका छैनन् ।

फ्लेक्स–फ्युल प्रविधिमा समस्या भोग्ने मारुती सुजुकी मात्र एक्लो कम्पनी होइन । दुई पाङ्ग्रे सवारी उत्पादक कम्पनी हिरो मोटोकर्पका फ्लेक्स–फ्युल मोटरसाइकलले पनि बजारमा ग्राहकहरूलाई आकर्षित गर्न निकै संघर्ष गरिरहेको छ ।