४ महिनामै ५० हजार युनिट भिक्टोरिस बिक्री

मारुती सुजुकीले हालै लन्च गरेको नयाँ एसयूभी भिक्टोरिसले छोटो अवधिमै ५० हजार युनिट बिक्री पाएको छ । सुजुकी इन्डियाले भिक्टोरिसको बिक्री ५० हजार युनिट पार गरेको घोषणा गरेको हो । उक्त माइलस्टोन ४ महिनाभन्दा कम समयमा हासिल गरिएको कम्पनीले जनाएको छ ।

मारुती भिक्टोरिस गत वर्ष सेप्टेम्बरमा लन्च गरिएको थियो, जसको मूल्य १० लाख ५० हजार भारु निर्धारण गरिएको छ । कम्पनीका अनुसार, जीएसटी सुधार लागू भएपछि भिक्टोरिसको औसत मासिक बिक्री आर्थिक वर्ष २०२४–२५ को तुलनामा दोब्बरभन्दा बढीले बृद्धि भएर २१ हजार १५५ युनिट पुगेको छ ।

जनवरीमा, मारुतीले १५ हजार २४० युनिट भिक्टोरिस बिक्री गरेको थियो, जुन नोभेम्बर र डिसेम्बरमा क्रमशः १२ हजार ३०० र ६ हजार २१० युनिट थियो ।

भिक्टोरिस १.५ लिटर माइल्ड–हाइब्रिड पेट्रोल इन्जिन, १.५ लिटर स्ट्रङ–हाइब्रिड र सिएनजी पावरट्रेनमा उपलब्ध छ । ट्रान्समिसनको कुरा गर्नुपर्दा यसमा ५ स्पिड म्यानुअल र ६ स्पिड अटोमेटिक गियरवक्सको विकल्प पाउन सकिन्छ ।

भिक्टोरिसको स्ट्रङ–हाइब्रिड संस्करणमा भने ईसिभिटी दिइएकाे छ । यो अल–ह्विल ड्राइभ भेरिएन्टमा समेत उपलब्ध छ । भिक्टोरिस सुजुकीको प्रोडक्ट पोर्टफोलियमो हालसम्मकै सर्बाधिक फिचर भएको एसयूभी हो ।