सुजुकीको थाइल्याण्ड प्लान्ट बन्द हुँदै, यस्तो छ कारण

सुजुकी मोटर थाइल्याण्डले सन् २०२५ को अन्त्यसम्ममा देशमा रहेको आफ्नो उत्पादन प्लान्ट बन्द गर्ने निर्णय गरेको छ ।

प्लान्ट बन्द गर्ने निर्णय थाइल्याण्डमा घट्दो बिक्रीको बीचमा आएको हो । आर्थिक वर्ष २०२३ मा सुजुकी मोटरले थाइल्याण्डमा १० हजार ८०७ युनिट मात्रै बिक्री दर्ता गरेको थियो भने निर्यात संख्या १ हजार २७२ युनिट थियो । सुजुकीले भने प्लान्ट बन्द गर्नको पछाडी विश्वव्यापी रूपमा कार्बन तटस्थता र विद्युतीकरणलाई बढावा दिने लक्ष्य अनुरूप रहेको जनाएको छ ।

२०११ मा स्थापना भएको सुजुकी मोटर थाइल्याण्डले २०१२ देखी घरेलु र निर्यात बजार दुवैका लागि विभिन्न मोडलका कारहरु उत्पादन गर्दै आएको छ । कम्पनीले थाइल्याण्डका लागि स्विफ्ट, सेलेरियो र सियाज जस्ता मोडल उत्पादन गर्दै आएको हो ।

उत्पादन बन्द गरे पनि देशमा आफ्नो बिक्री र बिक्रीपछिको सञ्चालनलाई निरन्तरता दिने सुजुकीले बताएको छ । साथै, कार्बन तटस्थता प्रवर्द्धन गर्न थाई सरकारको लक्ष्य अनुरूप, सुजुकीले बिद्युतिय र हाइब्रिड मोडेलहरू अगाडि बढाउने तयारी गरेको छ ।