एक दशकभित्र आकाशमा उड्ने कार देख्न सकिने, सुजुकीले पनि फ्लाइङ कार निर्माण गर्ने

जापानी अटो निर्माता कम्पनी सुजुकीले उड्ने कार बनाउने तयारी गरेको छ । यसका लागि कम्पनीले स्काईड्राइभ कम्पनीसँग सहकार्य गरेको छ । सुजुकीको यो इलेक्ट्रिक भर्टिकल टेकअफ र ल्यान्डिङ कार नयाँ जेनेरेशनको कार हुनेछ ।

यो नयाँ कार सन् २०२४ मा सार्वजनिक हुनेछ । कम्पनीको यो उड्ने कारले एक पटकमा धेरै यात्रुहरू लिएर उडान गर्न सक्छ ।

स्काईड्राइभले गत वर्ष मार्चमा कम्पनीले उड्ने कारको अनुसन्धान, विकास र मार्केटिङका लागि सुजुकीसँग साझेदारी गरेको थियो ।

स्काईड्राइभले ईभीटीओएल विमान विकास गरिरहेको छ । २०१८ मा स्थापना भएको कम्पनीले पहिले नै उडान कारको प्रोटोटाइप परीक्षण गरिरहेको छ र २०१९ मा चालक दलको परीक्षण उडान पूरा गर्न सफल भएको थियो ।

स्काईड्राइभले कम्प्याक्ट, २ सिटको विद्युतीय फ्लाइङ कारको विकास सुरु गरेको छ । कम्पनीले सो कारको सम्पूर्ण उत्पादन गर्ने योजना बनाएको छ । तर, सुजुकी यो कारको डेभलपमेन्ट पार्टनर बन्ने हो वा होइन भन्ने स्पष्ट छैन । यो दशकको अन्त्यसम्ममा उड्ने कार लन्च गर्न सकिने अनुमान गरिएको छ ।