ग्राण्ड भिटाराको बिक्री २ लाख युनिट नाघ्यो, ईभी क्रेजका कारण नेपालमा कम आकर्षण

मारुती सुजुकीको मिड साइज एसयूभी ग्राण्ड भिटारा लन्च भएको २ वर्षभन्दा कम समयमै २ लाख बढी यूनिट बिक्री भएको छ । सेप्टेम्वर २०२२ मा भारतिय बजारमा लन्च गरिएको सो एसयूभीले पहिलो वर्षमै १ लाख युनिट बिक्रीको आँकाडा पार गर्न सफल भएको थियो । उक्त बिक्रीसंगै भिटारा मिड साइज एसयूभीमा सबैभन्दा छिटो १ लाख युनिट बिक्री हासिल गर्ने एसयुभी बनेको थियो ।

सोसाइटी अफ इन्डियन अटोमोबाइल म्यानुफ्याक्चरर्सले सार्बजनिक गरेको तथ्याङ्क अनुसार, सुजुकीले जुन २०२४ को अन्त्यसम्ममा ग्राण्ड भिटाराका १ लाख ९९ हजार ५५० यूनिट बिक्री गरेको थियो । यो एसयूभी भारतमा प्रत्येक महिना औषतमा ९ हजार युनिटका दरले बिक्री हुँदै आएको छ ।

आर्थिक वर्ष २०२३ मा सुजुकीले ग्राण्ड भिटाराका ५१ हजार ३१५ यूनिट बिक्री गरेको थियो । त्यसपछिको आर्थिक वर्षमा यो संख्या बढेर १ लाख २१ हजार १६९ इकाई पुगेको छ । आर्थिक वर्ष २०२५ मा हालसम्म कार निर्माताले २७ हजार ६६ युनिट बिक्री गरिसकेको छ ।

ग्राण्ड भिटारा नेपाली बजारमा समेत उपलब्ध रहँदै आएको एसयूभी हो । यो एसयूभीलाई सिजी मोटोकर्पले भारतमा लन्च भएलगत्तै भित्र्याएको थियो । नेपाली उपभोक्ताको रोजाई ईभी बन्न थालेपछि यसको बिक्रीले खासै गति भने लिन सकिरहेको छैन ।

नेपाली बजारमा यो स्मार्ट र स्ट्रङ हाइब्रिड भर्सनमा उपलब्ध छ । जसको मूल्य ६४ लाखदेखी ८८ लाख रुपैयाँसम्म पर्छ ।