सनरुफसहित आउने भयो नयाँ डिजायर, यी प्रिमियम फिचर पनि थप हुने

मारुती सुजुकीले निकट भविष्यमा ल्याउने तयारी थालेको नयाँ डिजायर हालको मोडलभन्दा निकै हाई–टेक हुने भएको छ । कम्प्याक्ट सेडान डिजायरको चौथो जेनेरेशनमा कम्पनीले एक्सटेरियर सहित इन्टेरियर र फिचरमा ब्यापक परिमार्जन गर्न लागेको हो ।

केही समयअघि जापानमा सम्पन्न अटो शोमा प्रदर्शन गरिएको नयाँ जेनेरेशन स्विफ्टकै प्लेटमर्फमा तयार हुने नयाँ डिजायरमा सुजुकीले सनरुफ फिचर दिने बताएको छ । सो नयाँ कारको टप स्पेक जेडएक्सआई प्लस ट्रिम सिंगल प्यानल सनरुफसहित आउने कम्पनीले जनाएको हो ।

सनरुफ बाहेक यसमा ९ इन्चको टचस्क्रिन इन्फोटेन्मेन्ट स्क्रिन, वायरलेस एन्ड्रोइड एन्ड एप्पल कार प्ले, प्रिमियम ड्यासबोर्ड, हेड–अप–डिस्प्ले, अटो वाइन्डस्क्रिन वाइपर, वायरलेस मोबाइल चार्जिङ प्याड र ६ वटा एयरब्याग लगायत फिचर उपलब्ध हुने अनुमान गरिएको छ ।

भारतमा हाल डिजायरको तेस्रो जनेरेशन बिक्री हुँदै आएको छ । कम्प्याक्ट सेडान सेग्मेन्टमा हुन्डाई औरा, टाटा टिगोर र होन्डा अमेजसंग प्रस्पिर्धा गरिरहेको डिजायर यो सेग्मेन्टमा सर्बाधिक बिक्री हुने मोडल हो । सुजुकीको यो सेडान कार नेपाली बजारमा समेत उपलब्ध छ ।