इलेक्ट्रिक भर्सनमा लन्च हुने भयो सुजुकी जिम्नी

मारुती सुजुकीले प्लान २०३० अन्तर्गत इलेक्ट्रिक कारको बारेमा ठूलो घोषणा गरेको छ । सो योजना अनुसार कम्पनीले २०३० मा जिम्नी एसयूभीलाई इलेक्ट्रिक भर्सनमा लन्च गर्ने पक्का भएको छ । इलेक्ट्रिक भर्सनमा आउने जिम्नी एसयूभी बडी–अन–फ्रेम च्यासिसमा आधारित हुनेछ ।

जिम्नी इलेक्ट्रिकलाई फोर ह्विल ड्राइभट्रेनमा लन्च गरिने छ । यसको दुबै एक्सलमा इलेक्ट्रिक मोटर जडान गरिनेछ । जिम्नी ईभी ५ डोर भर्सनमा पेश गर्नेछ । मारुतीले जिम्नी ईभीलाई पहिले युरोपियन बजारमा लन्च गर्ने योजना बनाएको छ ।

रिपोर्टका अनुसार कम्पनीले सन् २०३० सम्ममा ६ वटा इलेक्ट्रिक सवारी साधन लन्च गर्ने तयारी गरेको छ । कम्पनीले अटो एक्सपो २०२३ मा सार्वजनिक गरेको ईभीएक्स इलेक्ट्रिक एसयूभी २०२५ मा लन्च गर्न सक्ने अनुमान गरिएको छ ।

कम्पनीले जिम्नी ईभीको टेक्नोलोजीको बारेमा आधिकारिक रूपमा खुलासा गरेको छैन । यद्यपि, रिपोर्टका अनुसार जिम्नी ईभी फुल चार्जमा ३५० देखि ४०० किमी रेन्जको हुनेछ ।

मारुती सुजुकी जिम्नीलाई अटो एक्सपो २०२३ मा फाइभ डोर भर्सनमा प्रदर्शन गरिएको थियो । यो भन्दा पहिले यसलाई थ्री डोर भर्सनमा विदेशी बजारमा बिक्रीका लागि तयार गरिन्थ्यो । हाल यसको बुकिङ पनि शुरु भएको छ र २०२३ जुनमा लन्च हुने अनुमान गरिएको छ ।

जिम्नीमा १.५ लिटर के१५बी पेट्रोल इन्जिन छ जसले १०३ बीएचपीको पावर र १३४ एनएमको टर्क जेनेरेट गर्छ । यसमा ५ स्पिड म्यानुअल र ६ स्पिड अटोमेटिक गियरबक्सको विकल्प रहेको छ । सो एसयूभीका सबै भेरिएन्टमा कम्पनीले फोर बाई फोर ड्राइभ सिस्टम स्ट्यान्डर्ड फिचरको रूपमा उपलब्ध गराउनेछ ।