मारुती सुजुकी फ्रोङ्क्सको निर्यात शुरु, नेपालमा पनि साउनभित्रै आउने

भारतमा हालै लन्च गरिएको मारुती सुजुकीको कम्प्याक्ट एसयूभी फ्रोङ्क्सको निर्यात प्रारम्भ भएको छ ।

पहिलो चरणमा ५५६ युनिट ल्याटिन अमेरिका, मध्यपूर्व र अफ्रिकाका लागि प्रस्थान गरेको छ । यस अनुसार आगामी दिनमा अन्य देशमा निर्यात हुनेछ ।

मारुती सुजुकी फ्रोङ्क्स नेपालमा समेत निकै नै प्रतीक्षा गरिएको कम्प्याक्ट एसयूभी हो । नेपालमा सीजी होल्डिङ्स अन्तर्गतको सीजी मोटोकर्पले सुजुकीका गाडीहरु बिक्री–वितरण गरिरहेको छ । कम्पनी स्रोतका अनुसार सम्भवतः साउन महिना भित्रै सो एसयूभी नेपाली बजारमा समेत भित्रिसक्ने छ ।

मारुती सुजुकीले भारतमा ७ लाख ४६ हजार भारु मूल्यमा भारतीय बजारमा फ्रोङ्क्स लन्च गरेको छ । बलेनोको प्लेटफर्ममा आधारित फ्रोङ्क्सलाई कुपे एसयूभीको रूप दिइएको छ ।

फ्रोङ्क्सको टप भेरिएन्ट लगभग १३ लाख १३ हजार भारुमा लन्च गरिएको छ । यसमा सिग्मा, डेल्टा, डेल्टा प्लस, जेटा र अल्फा ट्रिमहरू उपलब्ध छ । नेपाली बजारमा यसको मूल्य कति पर्छ भन्ने वारेमा भने अहिले नै केही बताइएको छैन ।

कम्पनीले सो कार २ वटा इन्जिनमा लन्च गरेको हो । यसमा पहिलो १.२ लिटर ४ सिलिन्डर पेट्रोल इन्जिन छ, यसले ८९ बीएचपी पावर जेनेरेट गर्छ । सो इन्जिन ५ स्पिड म्यानुअल र एएमटी विकल्पमा उपलब्ध छ । अर्कोतर्फ १.० लिटर ३ सिलिन्डर टर्बो पेट्रोल इन्जिन छ, जसले ९९ बीएचपी पावर जेनेरेट गर्छ । सो इन्जिन ५ स्पिड म्यानुअल र ६ स्पिड अटोमेटिक गियरबक्समा उपलब्ध छ ।

फ्रोङ्क्समा कम्पनीले अल एलईडी हेडल्याम्प, १६ इन्च ड्युअल टोन अलोय ह्विल, एलईडी टेललाइट, कन्ट्रास्ट कलर स्किड प्लेट र टप भेरिएन्टमा ड्युअल कलरको विकल्प दिएको छ ।

कारमा ६ एयर ब्याग, ३६० डिग्री क्यामेरा, एचयूडी, एप्पल कार प्ले र एन्ड्रोइड अटोलाई सपोर्ट गर्ने ९ इन्चको इन्फोटेनमेन्ट सिस्टम, क्रुज कन्ट्रोल, रियर एसी भेन्ट्स, वायरलेस चार्जर जस्ता फिचर पनि प्रदान गरिएको छ ।