सुजुकी ई–भिटाराको देशभर डेलिभरी सुरु

काठमाडौं–सीजी मोटोकर्पले नेपालभर नयाँ सुजुकी ई–भिटाराको औपचारिक डेलिभरी सुरु गरेको छ । कम्पनीले यो मोडललाई सुजुकीको पहिलो पूर्ण रूपमा निर्मित ब्याट्री सञ्चालित विद्युतीय सवारीका रूपमा नेपाली बजारमा ल्याएको थियो ।

विश्वसनीय जापानी इन्जिनियरिङ, अत्याधुनिक विद्युतीय सवारी प्रविधि, उच्च सुरक्षा सुविधा तथा दैनिक प्रयोगका लागि व्यावहारिक डिजाइनका कारण ई–भिटाराले सार्वजनिक भएलगत्तै ग्राहकबाट उत्साहजनक प्रतिक्रिया पाएको कम्पनीले जनाएको छ । हाल बुकिङ गरिएका सवारीहरू सुजुकीको आधिकारिक डिलर सञ्जालमार्फत ग्राहकलाई हस्तान्तरण गरिएको हो ।

लन्च अफरअन्तर्गत कम्पनीले ई–भिटाराको सुरुवाती मूल्य ४९ लाख ९९ हजार रुपैयाँ निर्धारण गरेको छ । यो विशेष मूल्य पहिलो १०० बुकिङका लागि मात्र लागू हुने बताइएको छ ।

नेपालभर रहेका २५ आधिकारिक बिक्री केन्द्र र ४० सेवा केन्द्रमार्फत ग्राहकलाई बिक्रीपछिको सेवा उपलब्ध गराइने कम्पनीले जनाएको छ । प्रशिक्षित प्राविधिक, सहज स्पेयर पाट्र्स उपलब्धता तथा विद्युतीय सवारी सेवा पूर्वाधारले दीर्घकालीन रूपमा कम लागत र विश्वसनीय स्वामित्व अनुभव सुनिश्चित गर्ने कम्पनीको दाबी छ ।

ई–भिटारामा ४९ किलोवाट आवर र ६१ किलोवाट आवर गरी दुई ब्याट्री विकल्प उपलब्ध छ । यी संस्करणले क्रमशः १०८ किलोवाट र १२८ किलोवाटसम्म पावर जेनेरेट गर्ने कम्पनीले जनाएको छ । कम्पनीका अनुसार यो आफ्नो मूल्य वर्गमा सबैभन्दा शक्तिशाली विद्युतीय एसयूभीमध्ये एक हो ।

यसमा १०.१ इन्चको डिजिटल डिस्प्ले, १०.२५ इन्चको बहु–सूचना डिस्प्ले, ‘इन्फिनिटी बाइ हार्मन’ ध्वनि प्रणाली, वायरलेस कनेक्टिभिटी, स्थिर काँचयुक्त सनरुफ, हावायुक्त सिट तथा बहुरङ्गी वातावरणीय प्रकाशजस्ता प्रिमियम सुविधा उपलब्ध छन् ।

साथै, इको, नर्मल र स्पोट्र्स ड्राइभिङ मोडसँगै ‘स्नो टेरेन मोड’ र रिजेनेरिटिभ ब्रेकिङ सिस्टम पनि समावेश गरिएको छ । कम्पनीले ई–भिटाराले ५०० किलोमिटरभन्दा बढी दूरी तय गर्न सक्ने जनाएको छ ।

५० प्रतिशतभन्दा बढी हाई टेन्साइल स्टिल प्रयोग गरी निर्माण गरिएको यस एसयूभीमा लेभल–२ एडास, ७ वटा एयरब्याग, सबै चक्कामा डिस्क ब्रेक, इलेक्ट्रोनिक पार्किङ ब्रेक, टायर प्रेसर मनिटरिङ सिस्टम र ई–कल जस्ता आधुनिक सेफ्टि फिचर्स उपलब्ध गराइएको छ ।