६० लाख युनिट उत्पादन भयो सुजुकीको यो स्कुटर, नेपालमा किन गुमनाम ?

सुजुकी मोटरसाइकल इण्डियाले एक्सेस १२५ स्कुटरको ६० औं लाख युनिटलाई रोलआउट गरेको छ । कम्पनीले १७ वर्षको अबधीमा एउटै मोडलको उत्पादन ६० लाख युनिट गरेर नयाँ माइलस्टोन हाँसिल गरेको हो ।

१२५ सिसी सेग्मेन्टमा भारतकै पहिलो स्कुटरका रुपमा सन् २००७ मा लन्च गरिएको एक्सेस हालपनि सर्बाधिक बिक्री हुने मोडलमा पर्छ । यो स्कुटरलाई भीजी अटोमोबाइल्सले सन् २०१६ मा आयोजना भएको नाडा अटो शोमार्फत नेपालमा लन्च गरेको थियो । त्यतिवेला यसको मुल्य १ लाख ९० हजार रुपैयाँ तोकिएको थियो ।

नेपाली बजारमा लन्च भएको सुरुवाती समयमा राम्रै बजार पाएको एक्सेस १२५ को बजार केही समयपछि नराम्रोसंग खस्किन थाल्यो । ११० सिसी सेग्मेन्टका स्कुटरको माग अत्याधिक बृद्धि हुँदा एक्ससेको बिक्री प्रभावित बनेकोे थियो ।

पछि बजारमा टिभिएस र याहाले १२५ सिसीका नयाँ स्कुटर ल्याएर राम्रो व्यापार गर्दा पनि एक्ससेको बजारले भने गति लिन सकेन । त्यसो त नेपालमा एक्सेसको मात्र नभई समग्र सुजुकी टु–ह्विलरकै बजार नराम्रोसंग खस्किएको छ ।

पछिल्लो ५ महिनाको आयत तथ्यांक हेर्दा सुजुकीले जम्मा ३०० युनिटमात्र स्कुटर आयत गरेको देखिन्छ । जवकी सो अबधीमा होन्डा एक्लैले २० हजारभन्दा बढी तथा टीभीएसले १२ हजार बढी स्कुटर आयात गरेका छन् ।

गुणस्तर र पर्फमेन्समा अब्बल हुँदाहुँदै पनि सुजुकीले नेपालमा राम्रो बजार पाउन नसक्नुका पछाडी वितरक कम्पनी भिजी अटोमोबाइल्सको कमजोरी प्रष्ट देखिन्छ । बिक्री पछिको सेवामा ध्यान दिन नसक्दा सुजुकी ब्रान्डमा ग्राहकको विश्वास कम हुँदै गएको हो । हाल यो ब्रान्ड नेपालको टु–ह्विलर बजारमा गुमनाम जस्तै बनेको छ ।

यस्तो छ एक्सेस १२५
सुजुकी इको पर्फमेन्स (एसईपी) प्रविधि दिएको यस स्कुटरमा फ्युल इन्जेक्सन प्रबिधी उपलब्ध छ ।

स्कुटरमा १२५ सिसी क्षमताको सिंगल सिलिन्डर इन्जिन जडान गरिएको छ । जसले, ८.५८ बिएचपी पावर तथा १० एनएम टर्क जनेरेट गर्ने सामथ्र्य राख्दछ ।

हल्का वजन र १६० एमएम ग्राउन्ड क्लिरियरन्स भएको यसमा लामो सिट, फराकिलो फ्लोरबोर्ड र २२.३ लिटर अण्डर सिट स्टोरेज छ । साथै यसमा वान–पुस सेन्ट्रल लकिङ प्रणाली, ब्लुटुथ–सक्षम डिजिटल इन्स्ट्रुमेन्ट कन्सोल र कम्वाइन्ड ब्रेकिङ सिस्टम जस्ता फिचर उपलब्ध गराइएको छ ।