म्याग्नाइट र कुशाकको सफलता, जसले अनिश्चित बनिसकेको ब्रान्डलाई बनायो स्थापित

नेपाली अटोबजारमा अहिले २ दर्जन बढी ब्रान्डका सवारीसाधन आयात भैरहेका छन् । विश्व बजारमा लोकप्रियता हासिंल गरेका प्रिमियम र महंगा कारहरु समेत एकपछि अर्को गरी नेपाल भित्रिइरहेका छन् । जसका कारण नेपालको कार बजार निकै नै प्रतिस्पर्धात्मक बन्दै गएको छ ।

प्रतिस्पर्धात्मक बन्दै गएको नेपालको अटो बजारमा कतिपय ब्रान्डलाई आफ्नो शाख जोगाउन अहिले पनि हम्मेहम्मे परिरहेको छ । माग कम भएपछि कतिपय यस्ता ब्रान्डहरु बजारमा गुमनाम बन्ने अवस्थामा पुगिसकेका छन् भने कतिपय ब्रान्डले बजारमा दरिलो उपस्थिति जनाउन थालेका छन् ।

विगतमा बजारको माग अनुसारको उत्पादन नभएका कारण बिक्री प्रभाबित बनेर संकटग्रस्त बन्ने अबस्थामा पुगिसकेका केही ब्रान्डहरुले भने अहिले नयाँ उत्पादन आएसँगै बजारमा धुम मच्चाउन थालिसकेका छन् । नयाँ उत्पादनसँगै बजारमा स्थापित हुने क्रममा रहेका ब्रान्डहरुमा निसान, स्कोडा र एमजी मोटर्स अहिले हटकेक बनेर उदाइरहेका छन् । यी ब्रान्डबारे अहिले बजारमा सर्बाधिक चर्चा समेत हुनेगरेको छ ।

जपानिज अटो ब्रान्ड निसान नेपाल भित्रिएको ४ दशक पुरा हुँदापनि विगतमा यो ब्रान्डले खासै चर्चा भने बटुल्न सकिरहेको थिएन । उच्च ब्रान्ड लिगेसी, पर्याप्त रेन्जका सवारीसाधन र बलियो तथा मजबुत इन्जिनका कारण बिश्व बजारमा लोकप्रिय बनिरहेको निसानले पछिल्लो समय नेपालमा चर्चा बटुल्न नसक्नुको एउटै कारण थियो, नेपाली ग्राहकले चाहेजस्तो उत्पादन नहुनु । सेडान कारको माग उच्च रहेको तत्कालीन समयमा सन्नी मोडलको कारोबार उत्कृष्ट रहेपनि पछि सेडानको बजार प्रभाबित बनेपछि निसान ब्रान्ड ओझेलमा परेको थियो ।

पछि आधिकारिक बितरकका रुपमा शारडा ग्रुपले यसलाई आफू मातहत लिएर बजार प्रबद्र्धनका गतिविधि बढाउँदै लगेपनि बजारमा सर्बाधिक माग हुने ह्याचब्याक र कम्प्याक्ट एसयूभी भै नसकेका कारण खासै बजार लिन सकेन । भारतीय बजारमा टेरानो एसयूभी सार्वजनिक भएपछि यसले यो सेग्मेन्टमा राम्रो बजार लिने अनुमान गरिएको थियो । तर अनुमान बिपरित यो एसयूभी भारत र नेपाल दुबै देशमा सफल हुन सकेन । पछि कम्पनीले टेरानो मोडल उत्पादन नै बन्द गनुपर्यो ।

टेरानाको असफलताबाट पाठ सिकेर पछि किक्स एसयूभीलाई बजारमा उतारेको निसानले यो एसयूभीबाट समेत खासै राम्रो नतिजा हात पार्न सकेन । भारतीय बजार नराम्रोसँग प्रभावित बनेपनि नेपालमा भने किक्सको बिक्री ठिकठाककै अवस्थामा छ । भारतमा लगतार २ वटा मोडल असफल बनेपछि यो ब्रान्डको अस्तित्वमाथि नै प्रश्न चिन्ह खडा भएको थियो । नेपालमा समेत निसानको भविष्यलाई लिएर विभिन्न टिकाटिप्णीहरु हुन थालिसकेको थियो ।

लगतार असफल भएपनि निसानले यसलाई हार नमानी नयाँ सेग्मेन्टमा जाने निर्णय लियो र फलस्वरुप सब फोर मिटर एसयूभी म्याग्नाइटको उत्पादन थाल्यो । बाजरमा उतारिएलगत्तै एकपछि अर्को किर्तिमानी बिक्री गर्न सफल म्याग्नाइटलाई अहिले माग बमोजिम आपूर्ति गर्न नै भ्याईनभ्याईको अवस्था छ । भारतमा मात्र होइन नेपालमा समेत यो एसयूभीको माग बढिरहेको छ । म्याग्नाइट अहिले यो सेग्मेन्टको मात्र लिडर बनेर उदाइरहेको छैन यसले नेपालमा निसान ब्रान्डको डुब्नै लागिसकेको बजारलाई स्थापित समेत गराएको छ ।

निसानजस्तै चेक रिपब्लिकन ब्रान्ड स्कोडाको बजार समेत नेपालमा प्रभावित बनिरहेको थियो । स्कोडा नेपाल भित्रिंदा तत्कालीन समयमा यसले निकै राम्रो चर्चा बटुलेको थियो । युरोपियन ब्रान्ड एकाएक नेपाल भित्रिएपछि यसले भविष्यमा समेत राम्रो बजार लिने अपेक्षा गरिएको थियो । तत्कालीन समयमा यसका ¥यापिड र फाबिया कारले राम्रै लोकप्रियता हासिंल गर्न सफल भएपनि पछि बजारमा कम्प्याक्ट एसयूभीको प्रभाव बढ्न थालेपछि भने यो ब्रान्डको बजार प्रभाबित बन्दै गयो । लामो समयसम्म यो सेग्मेन्टमा प्रवेश गर्न नसकेको स्कोडाले ¥यापिड र प्रिमियम एसयूभी कोराकमार्फत बजारमा आफ्नो उपस्थिति भने जनाउँदै आइरहेको थियो ।

भारतीय बजारमा मिड साइज एसयूभी कुशाक लन्च गरेपछि भने स्कोडाको बजार विस्तार हुन थालेको छ । यो एसयूभीको माग अहिले उच्च गतिमा बढिरहेको छ । कुशाकको सफलताले स्कोडालाई बजारमा स्थापित गराउने आधारहरु देखापरेका छन् । नेपाली बजारमा समेत यसले राम्रो पर्फमेन्स देखाउदै गएको छ । नेपाली बजारमा समेत स्कोडाको शाखलाई एक कदम माथि उठाउनका लागि यसले भूमिका खेल्ने अपेक्षा गरिएको छ ।