स्टेलान्टिसले घाटामा रहेका ब्रान्डलाई बन्द गर्ने, नेपालमा तीनवटा ब्रान्ड उपलब्ध

स्टेलान्टिस ग्रुपले घाटामा रहेका ब्रान्डलाई बन्द गर्ने घोषणा गरेको छ । विश्वको चौथो ठूलो कार उत्पादक स्टेलान्टिस अन्तर्गत हाल १४ वटा ब्रान्डका अटोमोबाइल आबद्ध छन् । यीमध्ये कुन ब्रान्ड घाटामा रहेको हो भन्ने वारे कम्पनीले कुनै जानकारी वाहिर ल्याएको छैन ।

ग्रुप अन्तर्गत हाल सिट्रोन, जीप, फियाट, अबार्थ, अल्फा रोमियो, मसेराटी, डड्ज, क्रिस्लर, राम, ओपेल, भक्सहल, लान्सिया, डिएस अटोमोबाइल र पूजो जस्ता ब्रान्ड आबद्ध छन् । पीएसए ग्रुप र फियाट क्राइस्लर अटोमोबाइल मिलेर सन् २०२१ मा स्टेलान्टिस ग्रुप स्थापना भएको थियो ।

ग्रुपका सिइओ कार्लोस टाभारेसले भने, ‘यदि उनीहरूले पैसा कमाउँदैनन् भने, हामी तिनीहरूलाई बन्द गर्नेछौं । हामी पैसा नआउने ब्रान्डहरू राख्न सक्दैनौं ।’ स्टेलान्टिस ग्रुपको नाफा पछिल्लो समय ४८ प्रतिशतसम्मले घटेपछि कम्पनीमाथी नाफा आर्जन गर्न नसक्ने ब्रान्डलाई उचित व्यवस्थापन गर्नुपर्ने दबाव सिर्जना भएको टाभारेसले बताए ।

स्टेलान्टिस ग्रुप अन्तर्गतका तीनवटा ब्रान्ड नेपाली बजारमा समेत उपलब्ध छ । नेपालमा हाल यसको सिट्रोन, जीप र पूजो ब्रान्ड बिक्री हुँदै आएको हो । यी तीनवटै ब्रान्डले नेपाली बजारमा खासै राम्रो बजार भने लिन सकिरहेका छैनन् ।