राज्यमन्त्री श्रेष्ठको रोजाईमा प-यो बीवाईडी अल न्यु ई६ इलेक्ट्रिक कार

काठमाडौं – प्रधानमन्त्री तथा मन्त्रिपरिषदको कार्यालयका राज्यमन्त्री उमेश श्रेष्ठले चिनियाँ अटोमोबाइल कम्पनी बीवाईडीको नेपाली बजारमा उपलब्ध सबैभन्दा धेरै रेन्ज दिने कार नयाँ ई६ खरिद गरेका छन् । बहालवाला मन्त्रीले आफ्नै खर्चमा विद्यूतीय कार किनेका हुन् ।

धेरै रेन्ज दिने र आरामदायी गाडी भएकाले सो गाडी खरिद गरेको राज्यमन्त्री श्रेष्ठले बताए । नेपाली बजारमा सन् २०२१ मा आए देखि नै यो गाडीले धेरै ग्राहकको मन जित्न सफल भएको छ ।

नेपाली बजारमा बीवाईडी अल न्यु ई६ को मूल्य ५७ लाख ५० हजार रुपैयाँ तोकिएको छ । यसमा ७१.७ किलोवाट आवरको ब्याट्री र ७० किलोवाटको मोटर प्रयोग गरिएको छ । फुल चार्जमा ५२२ किलोमिटर रेन्ज दिने भएकाले यो नेपाली बजारमा उपलब्ध इलेक्ट्रिक कार मध्ये धेरै रेन्ज दिने कारमा पर्छ ।

अल न्यु ई६ मा बीवाईडीले नै विकास गरेको नयाँ प्रविधिको ब्लेड ब्याट्री प्रयोग गरिएको छ ।

यो कार एलईडी डे टाइम रनिङ लाइट र एलईडी रियर कम्बिनेसन ल्याम्पले सुसज्जित छ । यसको इन्टेरियर लेदर सिट र ६–वे एड्जस्टेबल ड्राइभर र फ्रन्ट प्यासेन्जर सिट सहित उपलब्ध छ ।

त्यसैगरी यसमा ब्लुटुथ कनेक्टिभिटी सहितको १०.१ इन्चको रोटेटेबल टचस्क्रिन इन्फोटेनमेन्ट सिस्टम छ । त्यसैगरी यसमा भएको ५८० लिटरको बुट स्पेसमा ४ ठूला सुटकेश र १ सानो सुटकेश राख्न मिल्ने स्थान छ ।

बीवाईडी ई६ मा १०.१ इन्चको मल्टिमिडिया कारप्याड, एसी तथा डीसी फास्ट चार्जिङ, १७५ एमएम ग्राउन्ड क्लियरेन्स र ५८० एमएल स्पेसियस ट्रंक रहेको छ ।