नाडा ईभी एक्सपो २०२२ का लागि खुल्यो स्टल बुकिङ

काठमाडौं – आउँदो असोज ६ गते देखि ९ गतेसम्म काठमाडौंको भृकुटी मण्डप प्रदर्शनी हलमा नाडा अटोमोबाइल्स एसोसिएसन अफ नेपालद्वारा नेपालमै पहिलो पटक आयोजना हुने भएको नाडा ईभी एक्सपो २०२२ को लागि स्टल बुकिङ खुला गरिएको छ ।

नाडा ईभी एक्स्पो २०२२ समितिका सभापति अनुप बरालका अनुसार उक्त ईभी एक्सपोका लागि आगामी भाद्र ५ गते सम्म स्टल बुकिङ गर्न सकिने छ ।

नाडाका महासचिव सुरेन्द्रकुमार उपे्रतीले सम्बन्धित सवैलाई उक्त एक्सपोमा सहभागिताका लागि अनुरोध गर्दै सवैबाट आवश्यक सहयोगको लागि आग्रह समेत गरेका छन् ।

नाडाले यस पटक नेपालमै पहिलो नाडा ईभी एक्सपो आयोजना गर्ने निर्णय केही दिन पहिले गरेको थियो । एक्सपोमा नेपाली बजारमा उपलब्ध दुई पांग्रे देखि चार पांग्रे सम्मका इलेक्ट्रिक सवारी साधनका साथै यससँग सम्बन्धित विभिन्न एसेसरिज र अन्यको सहभागिता हुनेछ ।