कोरियन ब्रान्डको दबदबामा गुमनाम बनेको स्याङयोङ

नेपालको प्यासेन्जर कार बजारमा कोरियन ब्रान्डले आफ्नो बर्चस्व बढाउँदै लगेको छ । विश्व बजारमा समेत लोकप्रियता कमाउन सफल कोरियन ब्रान्ड हुन्डाई र कियाले आक्रामक बजार विस्तार गर्दै लगेपनि अर्को कोरियन ब्रान्ड स्याङयोङको भने नेपालमा खासै चर्चा हुने गरेको छैन ।

स्याङयोङ नेपाल भित्रिएको २ दशक भन्दा बढी समय बितिसकेको छ । शुरुवातमा गोल्छा अर्गनाइजेसनले यो ब्रान्डलाई नेपाल भित्र्याएको थियो । त्यसपछि पनि २ पटक आधिकारिक बितरक परिवर्तन भई हाल आईएमएस ग्रुपले यसको कारोबार गर्दै आइरहेको छ । सामसुङ मोबाइलको कारोबारबाट चर्चामा आएको यो ग्रुपले मोबाइल बिक्रीमा पाएको सफलता भने यो ब्रान्डमा पाउन सकिरहेको छैन ।

एक समय कोरियाको चर्चित अटोमोबाइल ब्रान्डका रुपमा परिचित यो ब्रान्डलाई हाल भारतिय अटो मेकर महिन्द्रा एन्ड महिन्द्राले खरिद गरेको छ । महिन्द्रा एन्ड महिन्द्राले खरिद गरेपनि भारतमा यसको उत्पादन भने प्रारम्भ भैसकेको छैन । हाल नेपाल भित्रिने यसका सबै मोडल कोरियाबाटै आयात भैरहेको छ ।

किन लिन सकेन बजार ?
कोरियन ब्रान्डकै हुन्डाई र कियाले बजार पिटिरहँदा अर्को कोरियन ब्रान्ड स्याङयोङले भने बजार लिन सकिरहेको छैन । यो ब्रान्डले बजार लिन नसक्नुको कारण पर्याप्त रेन्ज नभएर भने होइन । हाल यसका ५ वटा मोडल नेपाली बजारमा उपलब्ध छ । जसमध्ये १६ सय सीसी क्षमताको टिभोली एसयूभी, उक्त सीसी क्षमताकै अर्को एसयूभी एक्सएलभी, २ हजार सीसी क्षमताको कोरान्डो एसयूभी, २२ सय सीसी क्षमताको रेक्सटन एसयूभी र उक्त सीसी क्षमताकै मुसो ग्रान्ड पिकअप नेपाली बजारमा उपलब्ध रहँदै आइरहेको छ ।

कोरियाबाटै आयात हुने स्याङयोङ एसयूभी गुणस्तरका मामलामा प्रिमियम कोटीमा गनिने भएपनि मूल्य भने प्रतिस्पर्धात्मक नै रहेको देखिन्छ । यी एसयूभीको पावर, पर्फमेन्स र फिचर्ससमेत अब्बल रहेपनि अन्य ब्रान्डसँग प्रतिस्पर्धा गर्न नसक्दा आयातकर्ता कम्पनीको क्षमतामाथि प्रश्न उठ्ने गरेको छ ।

आईएमएस ग्रुपले यो ब्रान्डको कारोबार थालेको ५ बर्षभन्दा लामो समय बितिसके पनि हालसम्म कुनै पनि सर्भिस सेन्टर सञ्चालन गर्न सकिरहेको छैन । त्यसैगरी स्पेयर पार्ट्समा समेत ग्राहकलाई विश्वस्त पार्न सकिरहेको पाइदैन । सर्भिस र स्पेयर पार्ट्सको उचित प्रबन्ध गर्न नसकेका कारण यो ब्रान्ड पछि पर्दै गएको अटो जानकारहरु बताउँछन् ।

यस्तो छ उपलब्ध मोडल र मूल्य
१६ सय सीसी क्षमताबाट शुरु हुने यसको सबैभन्दा सस्तो एसयूभी एक्सएलभी एमटी सेमिलोडेड हो । यो एसयूभीको मूल्य नेपाली बजारमा ५८ लाख ९९ हजार निर्धारण गरिएको छ । त्यसपछि एक्सएलभीकै अटोमेटिक भेरिएन्टको मूल्य ६२ लाख ९९ हजार, टिभोली एमटी सेमी लोडेडको ६६ लाख ९९ हजार र टिभोलीकै अटोमेटिक भेरिएन्टको मूल्य ७५ लाख ९९ हजार रुपैयाँ तोकिएको छ ।

२ हजार सीसी क्षमताको कोरान्डो एमटीको मूल्य ७९ लाख ९९ हजार र कोरान्डोकै अटोमेटिक भेरिएन्टको मूल्य ८९ लाख ९९ हजार रुपैयाँ निर्धारण गरिएको छ । यसको सबैभन्दा महंगो एसयूभी रेक्स्टन एमटीको १ करोड ३८ लाख ९९ हजार र अटोमेटिक भेरिएन्टको मूल्य १ करोड ५४ लाख ९९ हजार रुपैयाँ पर्छ । यो एसयूभी २२ सय सीसी क्षमतामा उपलब्ध रहँदै आएको छ । त्यसैगरी सोही सीसी क्षमतामा उपलब्ध मुसो ग्रान्ड एमटी पिकअपको मूल्य ७४ लाख ९९ हजार रुपैयाँ निर्धारण गरिएको छ ।