भविष्यको ब्याट्री प्रविधि बन्दै छ सोलिड स्टेट : हालको ईभी ब्याट्री उत्सर्जनलाई करिव ४० प्रतिशत घटाउने

इलेक्ट्रिक सवारी साधनको वारेमा कसैले आलोचना गर्नु प¥यो भने सबैभन्दा पहिले उनीहरुले यसमा प्रयोग गरिने लिथियम आयोन ब्याट्री उत्पादनको समयमा निस्कने कार्बन डाइअक्साइडलाई औल्याउछन् । ब्याट्री उत्पादन प्रक्रियामा लिथियम निकाल्दा यस प्रकारको प्रदूषण फैलिने भएकाले हामीले सोचेजति वातावरणका लागि ईभी ठिक छैन भनिन्छ ।

यसको विकल्प खोजी भइरहेको समयमा हालै ‘मिनभिरो’ नामक कम्पनीले गरेको अनुसन्धानमा यस प्रकारको कार्बन उत्सर्जन प्रक्रियालाई हटाउनका लागि सोलिड स्टेट ब्याट्री प्रयोग गर्न सकिने बताइएको छ । यसले हालको तुलनामा ५ भागको २ भाग नै प्रदूषण हटाउने बताइएको छ ।

हालको लिथियम आयोन ब्याट्रीको तुलनामा एनएमसी–८११ सोलिड स्टेट ब्याट्रीलाई तुलना गरिएको थियो, जुन विकसित भइरहेको सबैभन्दा उपयुक्त ब्याट्री केमिस्ट्री हो । दुवैले इलेक्ट्रिकल इनर्जी निकाल्नका लागि लिथियमको प्रयोग गर्छन् र आयोन ट्रान्सफर गर्नका लागि पोजिटिभ र नेगेटिभ टर्मिनलको रुपमा एनोड र क्याथोड प्रयोग गर्छन् ।

इलेक्ट्रोलाइटको सन्दर्भमा भने उनीहरुको प्रयोग फरक हुन्छ । लिथियम आयोन ब्याट्रीले लिक्विड र सोलिड स्टेट ब्याट्रीले सोलिड इलेक्ट्रोलाइटको प्रयोग गर्छन् ।

सोलिड इलेक्ट्रोलाइटले फरक प्रकारको रासायनिक प्रतिक्रिया जनाउछ र यसबाट कम मूल्य, सुधारिएको सेफ्टी, फास्टर चार्जिङ टाइम, लङ रेन्ज र हाइयर इनर्जी डेन्सिटी जस्ता फाइदा दिन्छ ।

अनुसन्धानका अनुसार हाइयर इनर्जी डेन्सिटीका कारण सोलिड स्टेट ब्याट्रीको कार्बन फुटप्रिन्ट २४ प्रतिशतले घट्छ । कम मेटरियल भए पनि यसले धेरै इनर्जी स्टोर गर्न सक्ने भएकाले यसो भएको हो । यदि अझै दिगो साधनबाट निर्मित सामग्री प्रयोग गरियो भने यसलाई ३९ प्रतिशत सम्म घटाउन सकिने अनुमान गरिएको छ ।

यो तथ्य युरोपेली युनियनले प्रस्ताव गरेको ब्याट्री नियमनसँग मिल्दो देखिएको छ, जसले सामाजिक वातावरणीय दृष्टिकोणले लिथियमको भरपर्दो तरिकाले व्यवस्थापन गर्ने स्रोतको खोजी गरिरहेको छ ।

कार कम्पनी र ब्याट्री निर्माता कम्पनीहरु पनि सोलिड स्टेट टेक्नोलोजीतिर आकर्षित भइरहेका छन् । यसका आधारमा यो दशकको सेकेन्ड हाफमै यस प्रकारका ईभी बजारमा उपलब्ध हुने अनुमान गरिएको छ ।