धानखेतमा भेटिए ३ सय थान स्मार्ट लाइसेन्स

जनकपुरधाम-प्रदेश २ को अस्थायी राजधानी जनकपुरधामको मुजेलियास्थित यातायात कार्यालयका तीन सय थान स्मार्ट सवारी चालक अनुमतिपत्र धान खेतमा फालिएका अवस्थामा फेला परेको छ।

यातायात व्यवस्था विभागबाट बनेर तयार भएर आएका लाइसेन्स जनकपुरधाम उपमहानगरपालिका–१४ स्थित यातायात कार्यालयदेखि झन्डै दुई सय मिटर पश्चिमतर्फ रहेको खेतमा धान काट्न गएका महिलाले फेला पारेका हुन्। उनीहरुले लाइसेन्स संकलन गरेर यातायात कार्यालयलाई बुझाएका छन्।

‘बुधबार दिउँसो धान काट्न आउँदा खेतमा जताततै लाइसेन्स छरिएको अवस्थामा देख्यौंँ। तीन सय थान संकलन गरेर यातायातका कर्मचारीलाई बुझाएका छौंँ,’ एक महिलाले भनिन्। 

यातायात कार्यालयमा राखिएका लाइसेन्स धान खेतमा फेला परेपछि कार्यालयको सुरक्षामाथि नै प्रश्न उठेको छ।

यातायात कार्यालय जनकपुरधामका अधिकृत वीरेन्द्र साहले लाइसेन्स धान खेतमा फेला परेको स्वीकार गर्दै तीन सय थान स्मार्ट लाइसेन्स भेटिएको जानकारी बताए।

‘कसैले गलत नियत राखेर लाइसेन्स फालेको हुन सक्छ। यसबारे जिल्ला प्रशासन कार्यालय धनुषालाई जानकारी गराएका छौंँ,’ उनले भने। 

यातायात कार्यालय जनकपुरधाममा दलाल र बिचौलियाको सहज पहुँच छ। तिनले लाइसेन्ससहितका कागजात बोकेर आफूखुशी ओहोरदोहोर गरे पनि यातायात कार्यालयका कर्मचारी मूकदर्शक बन्ने गरेको सेवाग्राही बताउँछन्।

रासस