स्काइवेल ईटी५ चढ्नेहरु ३० वर्ष बढी बाँच्ने दावी, यस्तो छ कारण

तपाईलाई उच्च रक्तचाप अथवा नियमित रुपमा पखाला लाग्ने जस्ता समस्या छन् र रोग प्रतिरोधात्मक शक्ति बढाउनु पर्नेछ भने स्काइवेल ईभी चढ्नु उपयुक्त हुन्छ ।

स्काइवले ईभी उत्पादन गर्ने स्काइवर्थ अटोका संस्थापक ह्वाङ होङसेङले बेइजिङ अटो शोमा बोल्दै यो दावी गरेका हुन् । उनका अनुसार सो गाडी चढ्ने प्रत्येकको आयु ३० वर्ष बढ्छ र यसको अर्थ उनीहरु एक सय वर्ष बाँच्छन् ।

ह्वाङले आफूले स्काइवर्थका इलेक्ट्रिक कार चढ्न थालेपछि उच्च रक्तचाप, मधुमेह र अन्य समस्या समेत समाधान भएको बताए ।

यद्यपि यो उनको पहिलो अभिव्यक्ति भने होइन । यो भन्दा पहिले सन् २०२३ स्काइवर्थ अटोमोबाइल स्प्रिङ टेक्नोलोजी कन्फ्रेन्समा पनि उनले अहिले उद्यमीहरुको आयु १० वर्ष घटिरहेको र स्काइवर्थ कार प्रयोग गरी ३० वर्ष सम्म बढाउन सकिने बताएका थिए ।

ह्वाङको दावीमा कुनै प्रमाण भने छैन । तर पनि स्काइवर्थले बिक्री गरिरहेको स्काइवेल ईभी६ मोडलमा एक्टिभ स्लिप प्रमोसन टेक्नोलोजी भएको र यसले स्लिप क्वालिटी र हेल्थ इन्डिकेटर सहित डिप स्लिप स्टेटमार्फत स्वास्थ्य राम्रो बनाउन सहयोग गर्ने यसको वेबसाइटमा समेत उल्लेख गरिएको छ ।

ह्वाङ प्रत्येक दिनको मध्यान्हमा आफ्नो कारमा सुत्ने गर्छन् र अफिसमा सुतेर कामको वारेमा ध्यान जने भएकाले गाडीमा सुत्नु राम्रो हुने समेत बताउछन् ।

स्काइवर्थ चीनको न्यु इनर्जी भेइकल उत्पादक कम्पनी हो र यसलाई पहिले स्काइवेल न्यु इनर्जी ग्रुप भनिन्थ्यो । सन् २०१७ मा स्थापना भएको सो कम्पनी होम एप्लायन्स उत्पादन गर्ने कम्पनी स्काइवर्थ र बस कम्पनी नान्जिङ गोल्डन ड्रागनको सहकार्यबाट बनेको थियो । छोटो रुपमा यसलाई स्काइवेल भनिन्छ ।

स्काइवेलले हाल स्काइवेल ईटी५ उत्पादन र बिक्री–वितरण गर्छ । पहिले यसलाई स्काइवर्थ ईभी६ भनिन्थ्यो । यही स्काइवेल ईटी५ नेपाली बजारमा समेत हालै मात्र बिक्रीका लागि उपलब्ध भएको छ ।

नेपाली बजारमा जी मोटर्सले स्काइवेल ईटी५ बिक्री–वितरण गरिरहेको छ । स्काइवेल ईटी५ मा ८५.९ किलोवाट आवरको ब्याट्री प्याक रहेको छ । यसममा १५० किलोवाट क्षमताको विद्युतीय मोटर रहेको छ । यसको मूल्य १ करोड ९ लाख रुपैयाँ छ ।