स्कोडा फक्सवागन समूहले पार ग-यो १५ लाख सवारी उत्पादनको माइलस्टोन

स्कोडा अटो फक्सवागन इन्डिया प्रालिले भारतमा १५ लाख युनिट कार उत्पादन गरेर एक माइलस्टोन पार गरेको छ । फक्सवागन ग्रुप अन्तर्गत भारतमा स्कोडा, फक्सवागन, अडी, पोर्स र ल्याम्बोर्गिनीको इन्डियन अपरेसन म्यानेज गरिरहेको यो ग्रुपले हाल भारतका दुई प्लान्टबाट सवारी साधन उत्पादन गर्दै आएको छ । पुनेको चाकन र औरंगावादको शेन्द्रा प्लान्टबाट सवारी साधन उत्पादन हुँदै आएका छन् ।

स्कोडा अटो फक्सवागन इन्डिया प्रालिका म्यानेजिङ डाइरेक्टर पियुष अरोरा र सेल्स तथा मार्केटिङका एक्जिक्युटिभ डाइरेक्टर क्रिस्चियन कान भोन सिलनले सो अवसरमा खुसी व्यक्त गर्दै सबैलाई बधाई दिएका छन् ।

हाल पुनेको प्लान्टमार्फत स्कोडा कुशाक, स्कोडा स्लाभिया, फक्सवागन टाइगुन, फक्सवागन भर्टस, फक्सवागन पोलो र फक्सवागन भेन्टो उत्पादन भइरहेको छ । त्यसैगरी औरंगावाद फ्यासिलिटीबाट स्कोडा, फक्सवागन र औडीका प्रिमियम र लक्जरी मोडल उत्पादन हुन्छन् ।

स्कोडा कुशाक सन् २०२१ को जुनमा उत्पादन प्रारम्भ भएर नयाँ युगको शुरुवात गरेको थियो । भारतमै उत्पादन हुने र भारतकै लागि बनाइने गरी बनाइएको ‘इन्डिया २.०’ प्रोजेक्ट अन्तर्गत पहिलो सवारी साधन स्कोडा कुशाक थियो । प्यान्डेमिक र चिप अभावका बीच पनि यो ग्रुपले भारतमा महत्वपूर्ण उपलब्धि हासिल गरेको छ ।