स्कोडाले आफ्नो सबैभन्दा सस्तो इलेक्ट्रिक कार प्रस्तुत गर्ने

स्कोडा अटोले आज नयाँ इलेक्ट्रिक एसयूभी सार्वजनिक गर्ने तयारी गरेको छ । सार्वजनिक गर्नुअघि चेक अटोले सो एसयूभीको पहिलो झलक दिने भिडियो जारी गरेको छ ।

कम्पनीको सो इलेक्ट्रिक कार स्कोडाको ईभी सेगमेन्टमा अहिलेसम्मकै सबैभन्दा सानो र किफायती कार हुनेछ । कम्पनीले सो कार पहिले विश्वव्यापी बजारमा लन्च गर्नेछ त्यसपछि मात्र भारतमा लन्च गर्ने सम्भावना रहेको छ । नेपाली बजारमा पनि केही पछि सार्वजनिक हुने अनुमान गर्न सकिन्छ । साथै स्कोडा इन्डियाले यस वर्षको अन्त्यसम्म घरेलु बजारमा इनयाक ईभी लन्च गर्ने योजना बनाएको छ । कम्पनीले आफ्नो नयाँ इलेक्ट्रिक कारको मूल्य लगभग २५ हजार युरो हुने बताएको छ ।

कम्पनीले आफ्नो आगामी ईभीको बारेमा धेरै जानकारी साझा गरेको छैन । टिजर भिडियोमा यो ह्याचब्याक जस्तो स्टाइल र स्लिम एलईडी हेडलाइटको साथ फ्रन्टमा स्लिम एलईडी र इल्युमिनेटेड स्कोडा लोगो देख्न सकिन्छ । तर, रिपोर्टका अनुसार सो इलेक्ट्रिक कार फक्सवागन ग्रुपको एमईबी एन्ट्री प्लेटफर्ममा आधारित हुने सम्भावना छ ।

सो कारमा ब्याट्री प्याकका दुई विकल्प उपलब्ध हुने सम्भावना छ । स्कोडाले सो ईभीमा ३८ किलोवाट र ५६ किलोवाटतको ब्याट्री जोड्ने सम्भावना छ । एक पटक चार्जमा यसले ४५० किलोमिटरको रेन्ज हुने अपेक्षा गरिएको छ । विश्व बजारमा यसले फक्सवागन आईडीडट२ इलेक्ट्रिक ह्याचब्याकसँग प्रतिस्पर्धा गर्ने अपेक्षा गरिएको छ ।

साथै स्कोडाले हाल भारतमा लन्चको लागि इनयाक ईभीको परीक्षण गरिरहेको छ । कम्पनीका अनुसार यसले ६.७ सेकेन्डमा ० देखि १०० किलोमिटर प्रतिघण्टाको गति लिन सक्छ । यसमा ८२ किलोवाटको ब्याट्री प्याक दिइएको छ, जसले एक पटक चार्जमा ५०० किलोमिटरभन्दा बढीको रेन्ज प्रदान गर्छ । फास्ट चार्जरको मदतले यसलाई १० देखि ८० प्रतिशतसम्म चार्ज गर्न २८ मिनेट मात्र लाग्छ ।