आउँदै नयाँ स्कोडा सुपर्व, हाइब्रिड इन्जिनमा इलेक्ट्रिक रेन्ज १०० किलोमिटर हुने

स्कोडाले आफ्नो लोकप्रिय सेडान सुपर्वको चौथो जेनेरेशन बजारमा ल्याउने भएको छ । सो कारलाई कम्पनीले यसै वर्षको अन्तिमसम्ममा सार्वजनिक गर्ने तयारी थालेको जनाइएको छ । पाँच भिन्न इन्जिन अप्सनमा आउन लागेको सो कारको पावरट्रेन र केही फिचरलाई कम्पनीले पहिलोपटक वाहिर ल्याएको छ ।

नयाँ सुपर्वलाई स्कोडाले दुईवटा पेट्रोल, दुईवटा डीजेल र एउटा प्लग–इन–हाइब्रिड इन्जिनमा ल्याउने तयारी गरेको हो । जसअनुसार यसको प्लग–इन–हाइब्रिड मोडलमा २५.७ किलोवाट आवरको ब्याट्री सहित १.५ लिटर टीएसआई इन्जिन जडान गरिनेछ । जसको संयूक्त पावर २०४ एचपी रहनेछ भने यसको इलेक्ट्रिक रेन्ज १०० किलोमिटरसम्म रहने दावी गरिएको छ ।

यसैगरी यसको पेट्रोल भेरिएन्टमा माइल्ड हाइब्रिड सहितको १.५ लीटर टिएसआई र २.० लीटर टीएसआई इन्जिनको विकल्प दिइनेछ । जसको पावर क्रमशः २०४ एचपी र २६५ एचपी रहने कम्पनीले जनाएको छ । यसको दुईवटै पेट्रोल इन्जिनमा ७ स्पिड डुअल क्लच अटोमेटिक गियरवक्स उपलब्ध हुनेछ ।

नयाँ सुपर्वलाई स्कोडाले कोडियाकमा जस्तै दुईवटा डिजेल इन्जिनको विकल्प दिने भएको छ । जसमध्ये एउटाको पावर १५० एचपी र अर्कोको १९३ एचपी हुनेछ । सो सेडानको डिजेल पावरट्रेन ७ स्पिड डुअल क्लच अटोमेटिक गियरवक्स सहितको २.० लिटर डिजेल इन्जिमा उपलब्ध हुनेछ ।

यसमा १२.५ इन्चसम्मको टचस्क्रिन, स्टेरिङ कोलम माउन्टेड ड्राइभ सेलेक्टर, टर्न एसिस्ट सहितको एडिएएस फिचर र १० वटा एयरव्याग उपलब्ध हुनसक्ने अनुमान लगाइएको छ ।