स्कोडा कार चलाउने ड्राइभर सबैभन्दा बुद्धिमान : एक अध्ययन

कार सम्बन्धी तुलना गर्ने बेलायतको स्क्र्याप कार कम्प्यारिजनले गरेको एक अध्ययन अनुसार स्कोडा कार चलाउने ड्राइभरहरु सबैभन्दा बुद्धिमान हुने देखाएको छ । यसमा पनि आफ्नो व्यक्तिगत नम्बर प्लेट नभएका र ह्वाइट कलरको स्कोडा कार चलाउनेहरु सबैभन्दा बढी बुद्धिमान हुने सो अध्ययनले देखाएको छ ।

उनीहरुको इन्टेलिजेन्ट लेवल चेक गर्नका लागि विभिन्न ब्रान्डका कार चलाउने २ हजार ड्राइभरहरुलाई अध्ययनमा समावेश गरिएको थियो । उनीहरुले चलाउने कार, कलर र नम्बर प्लेट आदिका आधारमा नतिजा सार्वजनिक गरिएको थियो । यी सबै आधारमा जाँच गर्दा स्कोडा ड्राइभरहरुले औसत ९९ स्कोरको आईक्यु पाएर प्रथम स्थान हासिल गरेका हुन् ।

रोचक पक्ष के छ भने सबै ड्राइभरले औसतमा पाएको आइक्यु स्कोर ९३.७० भन्दा स्कोडा ड्राइभरले करिव ६ स्कोर बढी पाएका थिए । दोस्रो नम्बरमा सुजुकी र तेस्रो नम्बरमा प्युजो ब्रान्डका ड्राइभर इन्टेलिजेन्ट देखिएका छन् । उनीहरुले क्रमशः ९८.०९ र ९७.७९ स्कोर पाए ।

ल्यान्डरोभर चलाउनेले सबैभन्दा कम स्कोर पाए । यो भन्दा माथि बीएमडब्ल्यु र फिएट रहे । बीएमडब्ल्यु र फिएटले क्रमशः ९१.६८ र ९०.१४ स्कोर पाए ।

अर्को रोचक पक्ष के देखियो भने ह्वाइट र ग्रे कलर कार चलाउनेहरुले क्रमशः ९५.७१ र ९४.९७ स्कोर पाएर सबैभन्दा बढी बुद्धिमान भएको प्रमाणित गरे । त्यसैगरी ८८.४३ स्कोर पाएर ग्रिन कलर कार धनी सबैभन्दा कम बुद्धिमान हुने प्रमाणित भयो ।

स्क्र्याप कार कम्प्यारिजनका म्यानेजिङ डाइरेक्टर डान जिकले भने विभिन्न अध्ययनले ८५ देखि ११५ स्कोर सम्म हुने ड्राइभरहरुको आइक्युलाई औसत मानिने भन्दै यसमा लज्जित अनुभव नगर्न र यो एउटा अध्ययन मात्रै भएको बताएका छन् ।

जुनसुकै ब्रान्डको गाडी चलाए पनि आफू स्मार्ट हुनु र जिम्मेवार रुपमा गाडी चलाउनु नै महत्वपूर्ण हुने उनको भनाइ छ ।

गत वर्ष लन्डनवासीहरुले आफूलाई बेलायतका सबैभन्दा सिपालु ड्राइभर भएको बताउने गरेको समाचार सार्वजनिक भएको थियो । यस पछि यो अध्ययनको नतिजा सहितको समाचार सार्वजनिक भएको हो ।