एक वर्षमै ५० हजार युनिट उत्पादन पार गर्दै स्कोडा काइलकले रच्यो नयाँ इतिहास

स्कोडाकाे ४ मिटरभन्दा कम लम्बाइको लोकप्रिय एसयूभी काइलकले एक वर्षभित्रै ५० हजार युनिट उत्पादनको आँकडा पार गर्दै एउटा महत्वपूर्ण कोशेढुङ्गा हासिल गरेको छ ।

यो उल्लेखनीय उपलब्धि महाराष्ट्रको पुणे नजिकै रहेको चाकन प्लान्टमा हासिल गरिएको हो, जहाँ काइलकको निर्माणमा स्थानीय कम्पोनेन्टहरूको व्यापक प्रयोग गरिएको छ। यसले स्कोडा अटो फक्सवागन इन्डियाको ‘मेक इन इन्डिया’ पहलप्रतिको गहिरो प्रतिबद्धता मात्र होइन, भारतको बढ्दो इन्जिनियरिङ, डिजाइन र उत्पादन क्षमताको समेत स्पष्ट प्रमाण प्रस्तुत गर्दछ।

काइलकले सन् २०२५ मा स्कोडा अटो फक्सवागन इन्डिया समूहको कुल वार्षिक वृद्धिमा ३६ प्रतिशतको महत्वपूर्ण योगदान दिएको छ। सो उपलब्धि हासिल गर्न कम्पनीले उत्पादन क्षमतामा उल्लेखनीय वृद्धि गर्नुका साथै लागत नियन्त्रणमा ध्यान दिएको र आपूर्तिकर्ताहरूसँग बलियो साझेदारी निर्माण गरेको छ। काइलकको मागलाई सहज रूपमा पूरा गर्न कम्पनीले चाकन प्लान्टमा आफ्नो उत्पादन क्षमता करिब ३० प्रतिशतले बढाएको छ ।

भारतीय बजारमा स्कोडा काइलकको एक्स शोरूम मूल्य ७ लाख ५९ हजार भारुबाट सुरु भएर १२ लाख ९९ हजार भारुसम्म पर्छ । १.० लिटर टर्बो पेट्रोल इन्जिनले सुसज्जित सो एसयूभी आकर्षक डिजाइन, आधुनिक फिचर र बलियो प्रदर्शनका कारण लोकप्रिय बन्दै गएको छ।