केही दिनमै स्कोडा कुशाकको मूल्य नेपालमा सार्वजनिक हुँदै, कति पर्ला मूल्य ?

काठमाडौं – नेपाली बजारका लागि स्कोडा कुशाकको मूल्य केही दिनमै सार्वजनिक हुने भएको छ । नेपालका लागि स्कोडाको आधिकारिक वितरक एमएडब्ल्यु इन्टरप्राइजेजले केही दिनमै यसको मूल्य सार्वजनिक गर्ने संकेत गरेको छ ।

यद्यपि यो भन्दा पहिले नै नेपाली बजारमा यसको मूल्य ५० लाख देखि ६५ लाख रुपैयाँ सम्म हुन सक्ने धेरैले अनुमान गरेका छन् । तर पनि वास्तविक मूल्य कति हुन्छ, यसका लागि भने केही दिन पर्खिनु पर्नेछ ।

भारतमा स्कोडा कुशाकको मूल्य १० लाख ४९ हजार देखि १७ लाख ५९ हजार रुपैयाँ सम्म तोकिएको छ । भारतीय बजारका लागि यो निकै नै प्रतिस्पर्धि मूल्य हो । यसकारण पनि भारतमा स्कोडा कुशाकको चर्चा चुलिएको छ । भारतमा १० दिनकै अवधिमा २ हजार ५ सय युनिट कुशाक बुकिङ भएका छन् । यसको डेलिभरी समेत प्रारम्भ भइसकेको छ ।

अब स्कोडा कुशाकको प्रतीक्षामा नेपाली ग्राहक छन् । नेपाली बजारमा पनि स्कोडा कुशाकको बुकिङ प्रारम्भ भइसकेको छ । मूल्य सार्वजनिक भए पश्चात केही दिनमै नेपाली बजारमा समेत यो गाडी बिक्रीका लागि उपलब्ध हुनेछ । कम्पनीले पहिले नै साउन महिना देखि यो गाडी नेपाली बजारमा उपलब्ध हुने बताइसकेको छ ।

स्कोडा कुशाक भारतमा फक्सवागन ग्रुपको प्रोजेक्ट २.० अन्तर्गत बनेको पहिलो गाडी हो । सो प्रोजेक्टमा यो ग्रुपले १ अर्ब युरो लगानी गरेको छ, जुन सिंगल बजारका लागि यति धेरै खर्च गरिएको पहिलो उदाहरण हो । यस अन्तर्गत यसमा ९५ प्रतिशत स्थानीयकरण गरिएको छ, जसले गर्दा गाडी कम मूल्यमै उपलब्ध हुनुका साथै बिक्री पछिको सेवा (आफ्टर सेल्स सर्भिस) मा समेत सहजता हुने बताइएको छ । स्कोडा कुशाक एमक्यूबी–एओ–आईएन प्लेटफर्ममा बनेको छ, जुन भारतीय बजारकै लागि विशेष रुपमा बनाइएको हो ।

भारतमा समेत हाल १.० लिटर टीएसआई इन्जिनयुक्त स्कोडा कुशाक डेलिभरी हुँदैछ । नेपाली बजारमा पनि यही स्कोडा कुशाक उपलब्ध हुने बताइएको छ । स्कोडा कुशाक तीन भेरिएन्ट एक्टिभ, एम्बिसन र स्टाइलमा उपलब्ध हुनेछ ।

स्कोडा कुशाकमा पाँच कलर अप्सन उपलब्ध हुने छन् । यसले मिड साइज एसयूभी सेगमेन्टमा हुन्डाई क्रेटा र किया सेल्टोससँग प्रतिस्पर्धा गर्नेछ ।

कुशाक संस्कृत शब्द हो र यसको अर्थ राजा वा सम्राट हुन्छ । यद्यपि यो कारले आफ्नो क्षमता र पर्फमेन्सका आधारमा राजा वा सम्राट बन्छ वा बन्दैन भन्ने कुरा थाहा पाउन भने केही समय पर्खिनु पर्नेछ ।