भारतमा लन्च भयो क्रेटा र सेल्टोसको प्रतिस्पर्धि स्कोडा कुशाक, नेपालमा समेत उपलब्ध हुने

स्कोडा अटोले भारतीय बजारमा बहुप्रतीक्षित एसयूभी कुशाक लन्च गरेको छ । स्कोडा कुशाक एक्टिभ, एम्बिसन र स्टाइल गरी तीन भेरिएन्टमा उपलब्ध हुनेछ । आगामी जुलाई देखि यसको डेलिभरी हुनेछ ।

स्कोडा कुशाकको उत्पादन कम्पनीको पुणेस्थित चाकन प्लान्टमा भइरहेको छ । यसले मिड साइज एसयूभी सेगमेन्टमा हुन्डाई क्रेटा र किया सेल्टोससँग प्रतिस्पर्धा गर्नेछ । कुशाक संस्कृत शब्द हो र यसको अर्थ राजा वा सम्राट हुन्छ । यद्यपि यो कारले आफ्नो क्षमता र पर्फमेन्सका आधारमा राजा वा सम्राट बन्छ वा बन्दैन भन्ने कुरा थाहा पाउन भने केही समय पर्खिनु पर्नेछ ।

इन्जिन र पावर
स्कोडा कुशाक दुई इन्जिन अप्सनमा उपलब्ध हुनेछ । यसमा भएको १.० लिटर थ्री सिलिन्डर टर्बोचार्ज्ड पेट्रोल इन्जिनले ११५ पीएस पावर र १७५ एनएम टर्क जेनेरेट गर्छ । सो इन्जिनका साथ ६–स्पिड म्यानुअल वा ६–स्पिड टर्क कन्भर्टर गियरबक्सको विकल्प हुनेछ । त्यसैगरी अर्को १.५ लिटर टीएसआई फोर सिलिन्डर टर्बोचार्ज्ड पेट्रोल इन्जिनले १५० पीएस पावर र २५० एनएम टर्क जेनेरेट गर्छ । सो इन्जिनको साथ ६–स्पिड म्यानुअल र ७–स्पिड डीएसजी गियरबक्स विकल्प हुनेछ ।

लुक र डिजाइन
स्कोडा क्शाकको लुक निकै नै बोल्ड र मोडर्न छ । यसको फराकिलो ग्रिलमा सानदार दोहोरो स्लेटको प्रयोग गरिएको छ । यसको फ्रेम र स्लेट एलईडी क्रिस्टलले बनेको छ भने एलईडी लाइटले यसमा थप निखारता ल्याउछ । एलईडी हेडलाइट, एलईडी हाई बिम र एल आकारको एलईडी लाइटले गाडीमा थप सुन्दरता थपेको छ । एलईडी फगलाइट ,जालीदार एयर इन्लेट र आल्मुनियम फ्रन्ट स्पोइलर आदिका कारण गाडीको डिजाइनमा निखारता ल्याएको छ ।

आकर्षक फिचर
यसको इन्टेरियर ठूलो र स्पेसियस छ । यसमा १० इन्चको डिजिटल इन्स्ट्रयुमेन्ट क्लस्टर छ भने स्मार्टफोन कनेक्टिभिटी, कनेक्टेड कार टेक्नोलोजी र अन्य विभिन्न फिचर उपलब्ध छन् । एम्बिएन्ट लाइटिङ, भेन्टिलेटेड फ्रन्ट सिट, वायरलेस चार्जिङ, कुल्ड ग्लोब बक्स, ६–स्पिकर र ५० वाट सबउफर, इन्टरनल मेमोरी स्टोरेज, वायरलेस स्मार्टलिंक, एन्ड्रोइड अटो, एप्पल कारप्ले, टाइप सी यूएसबी पोर्ट र माई स्कोडा कनेक्ट एप जस्ता फिचर यसमा उपलब्ध छन् ।

सेफ्टी
स्कोडा कुशाकको टप स्पेकमा ६ एयरब्याग, आइएसओएफआईएक्स चाइल्ड सिट माउन्ट, अटो हेडल्याम्प र वाइपर र मल्टी कोलिजन ब्रेकिङ सिस्टम जस्ता सेफ्टी फिचर उपलब्ध छन् ।

कलर, साइज र मूल्य
स्कोडा कुशाकमा पाँच कलर अप्सन उपलब्ध हुने छन् । यसको टप भेरिएन्टमा १७ इन्चको अलोय ह्विल छ । यसको ग्राउन्ड क्लियरेन्स १८८ एमएम र ह्विलबेस २,६५१ एमएम छ । यसको लम्बाई, चौडाई र उचाई क्रमशः ४,२२५ एमएम, १,७६० एमएम र १,६१२ एमएम छ । यसमा ३८५ लिटरको बुट स्पेस छ र यसलाई १,४०५ एमएम सम्म बढाउन सकिन्छ ।

भारतमा स्कोडा कुशाकको सुरुवाती मूल्य १० लाख ५० हजार र टप भेरिएन्टको मूल्य १७ लाख ६० हजार भारु तोकिएको छ ।

फक्सवागन ग्रुपले इन्डिया २.० प्रोजेक्ट अन्तर्गत पहिलो उत्पादनको रुपमा स्कोडा कुशाकलाई बजारमा उतारेको हो । यसमा पहिलो पटक एमक्यूबी–एओ–आईएन प्लेटफर्मको प्रयोग गरिएको छ । यो भारतीय बजारका लागि उच्च स्तरीय रुपमा स्थानीयकरण गरेर बनाइएको हो । यसका आधारमा पनि यो भारतीय र नेपाली बजारका लागि समेत उपयुक्त एसयूभी हुने अनुमान गरिएको छ ।

नेपाली बजारमा स्कोडाको आधिकारिक वितरक एमएडब्ल्यु इन्टरप्राइजेज प्रालिले स्कोडा कुशाकको प्रि–बुकिङ केही दिनमै खोल्ने बताएको छ । नेपाली बजारमा यसको मूल्य ५० लाख देखि ६५ लाख रुपैयाँ सम्म पर्ने अनुमान गरिएको छ ।