भारतमा स्कोडा कुशाकको डेलिभरी प्रारम्भ, प्रतीक्षामा नेपाली ग्राहक

चेक कार निर्माता कम्पनी स्कोडा कुशाकको भारतमा डेलिभरी प्रारम्भ भएको छ । गत जुन २८ मा लन्च गरिएको ५ सिटर कम्प्याक्ट एसयूभी स्कोडा कुशाक कम्पनीको अपेक्षा मुताबिक नै बुकिङ भएको कम्पनीले बताएको छ ।

स्कोडा अटोले भारतमा १० दिनमै २ हजार ५ सय बुकिङ हासिल गर्न सफल भएको छ । नेपाली बजारका लागि स्कोडा कुशाकको बुकिङ प्रारम्भ भइसकेको छ । नेपालका लागि स्कोडाको आधिकारिक वितरक एमएडब्ल्यु इन्टरप्राइजेजले साउन महिनामा सो एसयूभी नेपाली बजारमा उपलब्ध गराउने बताइसकेको छ ।

भारतमा समेत हाल १.० लिटर टीएसआई इन्जिनयुक्त स्कोडा कुशाक डेलिभरी हुँदैछ । नेपाली बजारमा पनि यही स्कोडा कुशाक उपलब्ध हुने बताइएको छ ।

स्कोडा कुशाक तीन भेरिएन्ट एक्टिभ, एम्बिसन र स्टाइलमा उपलब्ध हुनेछ । यी मध्ये सबैभन्दा बढी अर्थात ४० प्रतिशतले एम्बिसन भेरिएन्ट बुकिङ गरेको बताइएको छ ।

कुशाक संस्कृत शब्द हो र यसको अर्थ राजा वा सम्राट हुन्छ । यद्यपि यो कारले आफ्नो क्षमता र पर्फमेन्सका आधारमा राजा वा सम्राट बन्छ वा बन्दैन भन्ने कुरा थाहा पाउन भने केही समय पर्खिनु पर्नेछ ।

स्कोडा क्शाकको लुक निकै नै बोल्ड र मोडर्न छ । यसको फराकिलो ग्रिलमा सानदार दोहोरो स्लेटको प्रयोग गरिएको छ । यसको फ्रेम र स्लेट एलईडी क्रिस्टलले बनेको छ भने एलईडी लाइटले यसमा थप निखारता ल्याउछ । एलईडी हेडलाइट, एलईडी हाई बिम र एल आकारको एलईडी लाइटले गाडीमा थप सुन्दरता थपेको छ । एलईडी फगलाइट ,जालीदार एयर इन्लेट र आल्मुनियम फ्रन्ट स्पोइलर आदिका कारण गाडीको डिजाइनमा निखारता ल्याएको छ ।

यसको इन्टेरियर ठूलो र स्पेसियस छ । यसमा १० इन्चको डिजिटल इन्स्ट्रयुमेन्ट क्लस्टर छ भने स्मार्टफोन कनेक्टिभिटी, कनेक्टेड कार टेक्नोलोजी र अन्य विभिन्न फिचर उपलब्ध छन् । एम्बिएन्ट लाइटिङ, भेन्टिलेटेड फ्रन्ट सिट, वायरलेस चार्जिङ, कुल्ड ग्लोब बक्स, ६–स्पिकर र ५० वाट सबउफर, इन्टरनल मेमोरी स्टोरेज, वायरलेस स्मार्टलिंक, एन्ड्रोइड अटो, एप्पल कारप्ले, टाइप सी यूएसबी पोर्ट र माई स्कोडा कनेक्ट एप जस्ता फिचर यसमा उपलब्ध छन् ।

स्कोडा कुशाकको टप स्पेकमा ६ एयरब्याग, आइएसओएफआईएक्स चाइल्ड सिट माउन्ट, अटो हेडल्याम्प र वाइपर र मल्टी कोलिजन ब्रेकिङ सिस्टम जस्ता सेफ्टी फिचर उपलब्ध छन् ।

स्कोडा कुशाकमा पाँच कलर अप्सन उपलब्ध हुने छन् । यसको टप भेरिएन्टमा १७ इन्चको अलोय ह्विल छ । यसको ग्राउन्ड क्लियरेन्स १८८ एमएम र ह्विलबेस २,६५१ एमएम छ । यसको लम्बाई, चौडाई र उचाई क्रमशः ४,२२५ एमएम, १,७६० एमएम र १,६१२ एमएम छ । यसमा ३८५ लिटरको बुट स्पेस छ र यसलाई १,४०५ एमएम सम्म बढाउन सकिन्छ ।

नेपाली बजारमा यसको मूल्य ५० लाख देखि ६५ लाख रुपैयाँ सम्म पर्ने अनुमान गरिएको छ । यसले मिड साइज एसयूभी सेगमेन्टमा हुन्डाई क्रेटा र किया सेल्टोससँग प्रतिस्पर्धा गर्नेछ ।