स्कोडाको पहिलो इलेक्ट्रिक कार इनायकको भारतमा परिक्षण, नेपाल आउने संभावना कति ?

स्कोडाले सार्वजनिक गर्ने तयारी गरिरहेको पहिलो इलेक्ट्रिक कार इनायक आइभी परिक्षणका क्रममा भारतीय सडकमा देखापरेको छ । यो क्रसओभर एसयूभीलाई कम्पनीले अर्को वर्ष भारतीय बजारमा लन्च गर्ने योजना बनाएको छ । यो कार सार्वजनिक भएपछि यसले हुन्डाई आयोनिक ५ र किया इभी ६ लगायत मोडलसंग प्रतिस्पर्धा गर्ने जनाइएको छ ।

यो एसयूभीलाई स्कोडाले फक्सावागनले प्रयोगमा ल्याएको एमइवी प्लेटफर्ममा निर्माण गरेको हो । जुन प्लेटफर्ममा फकसवागनले आइडी ४ र औडीले क्यू४ ई ट्रोन निर्माण गरिसकेको छ । यो नयाँ कार ४६४८ एमएम लामो, १८७७ एमएम चौडा र १६१६ एमएम अग्लो हुनेछ ।

तीनवटा व्याट्री प्याक अप्सनमा आउने यो कारको ५५ किलोवाट आवर व्याट्री प्याकले ३४० किलोमिटर, ६२ किलोवाट आवरको व्याट्री प्याकले ३९० किलोमिटर र ८२ किलोवाट आवर प्याकले ५१० किलोमिटर रेन्ज प्रदान गर्ने दावी गरिएको छ । यो कारको मूल्य भारतमा ६० लाख भारु हारहारी पर्ने आँकलन गरिएको छ ।

भारतीय बजारमा लन्च भएपछि यो एसयूभी नेपाली बजारमा समेत भित्रिने अनुमान गर्न सकिन्छ । स्कोडालाई हाल एमएडव्लू इन्टरप्राइजेजले आयत गरी कारोबार गरिरहेको छ । स्कोडाले नेपाली बजारमा प्रतिस्पर्धात्मक मूल्यमा पाइने युरोपियन ब्रान्डको छवि कायम गरेको छ ।