गत आर्थिक वर्षको १२ महिनामा भित्रिए बराबर विद्युतीय गाडी अहिले भित्रिए ६ महिनामै

काठमाडौं– चालु आर्थिक वर्षको ६ महिनामै गत आर्थिक वर्षभर नेपाल भित्रिए बराबरको संख्यामा विद्युतीय गाडी भित्रिएका छन्। गत वर्ष कुल १८ सय ७ वटा विद्युतीय कार, जिप र भ्यान आयात भएका थिए भने यो वर्षको ६ महिनाको अवधिमै १७ सय ४९ युनिट विद्युतीय कार, जिप र भ्यान आयात भएका छन्।

यो वर्षको पुस महिनामा मात्रै १ अर्ब १० करोड ३४ लाख ४५ हजार रुपैयाँको ३९६ वटा विद्युतीय सवारी साधन आयात भएका छन् । भन्सार विभागको तथ्यांक अनुसार गत वर्ष ५ अर्ब बराबरको विद्युतीय गाडी आयात भएका थिए भने यो वर्षको ६ महिनामा ४ अर्ब ९२ करोड रुपैयाँका विद्युतीय गाडी आयात भएका छन् ।

सो अवधिमा सबैभन्दा बढी १०० किलोवाटभन्दा कम रेन्जका विद्युतीय जिप, कार र भ्यान आयात गरेको छ । ६ महिनाको अवधिमा नेपालले ४ अर्ब ७३ करोड ७८ लाख ७३ हजार रुपैयाँको १७ सय ८ वटा १०० किलोवाटभन्दा कम रेन्जको विद्युतीय सवारी साधन आयात गरेको छ ।

त्यसैगरी, १०० किलोवाट देखि २०० किलोवाटसम्मको १५ करोड ६१ लाख २२ हजार रुपैयाँको ३५ वटा र २०० किलोवाटदेखि ३०० किलोवाटसम्मको ३ करोड ५१ लाख ५० हजार रुपैयाँको ६ वटा विद्युतीय जिप, कार र भ्यान आयात गरेको छ ।

सरकारले चालु आर्थिक वर्षको बजेटमार्फत् १०० किलोवाटभन्दा माथिको विद्युतीय गाडीको अन्तशुल्क लाग्ने व्यवस्था गरेको छ । यसअघि विद्युतीय गाडीमा अन्तशुल्क लाग्ने व्यवस्था थिएन । तर, यो वर्षको बजेटमार्फत् तत्कालीन अर्थमन्त्री जनार्दन शर्माले अन्तशुल्क र भन्सार करमा वृद्धि गरेको घोषणा गरेका थिए । जसले गर्दा १०० किलोवाटमाथिको जिप, कार र भ्यान आयातमा निकै प्रभाव परेको छ ।