सिंगल चार्जमा १ हजार किमी रेन्ज दिने नर्वेजियन इलेक्ट्रिक कारको चर्चा

नर्वेको इलेक्ट्रिक भेइकल स्टार्टअप फ्रेस्कोले ८ सिटको अल–ह्विल ड्राइभ इलेक्ट्रिक कार सार्वजनिक गरेको छ, जसले एक पटक चार्जमा १ हजार किलोमिटरको रेन्ज पार गर्न सक्ने दाबी गरिएको छ । रेभेरी कन्सेप्ट इलेक्ट्रिक कार सार्वजनिक गर्ने फ्रेस्को मोटर्सले केही दिन अघि आफ्नो पहिलो इलेक्ट्रिक गाडी प्रदर्शन गरेको थियो । सो कार नर्वेजियन ईभी स्टार्टअपका संस्थापक, सीईओ र अध्यक्ष एस्पेन क्वाल्विकले डिजाइन गरेका थिए ।

फ्रेस्को एक्सएल इलेक्ट्रिक कार मल्टी परपोज जस्ता सुविधा भएको मिनी भ्यान हो । यो कारमा प्रशस्त ठाउँ उपलब्ध भएकाले यसलाई एक्स्ट्रा लार्ज नाम दिइएको छ । कम्पनीले यो कारमा ८ जना सिट क्षमता रहेको र कारमा सुत्न मन लागेमा यसका सिटलाई फोल्ड गरेर ४ जनाको सुत्ने ठाउँ बनाउन सकिने बताएको छ ।

सो कार ३०० किलोमिटर प्रतिघन्टाको गतिमा दौड्न सक्ने र ० देखि १०० किलोमिटर प्रतिघन्टाको गतिमा पुग्न २ सेकेन्ड मात्रै लाग्ने दाबी गरिएको छ ।

फ्रेस्कोले सो इलेक्ट्रिक कारको बारेमा धेरै विवरण खुलासा गरेको छैन । कम्पनीले सो कारको भिडियो सोशल मिडियामा सेयर गरेको थियो । यद्यपि कम्पनीले सो इलेक्ट्रिक कार १ लाख युरोमा प्रि–अर्डर लिन थालेको छ ।

अमेरिकी भविष्यवादी ज्याक फ्रेस्कोको नाममा फ्रेस्को मोटर्स सन् २०१७ मा सुरु गरिएको थियो ।