दोब्बर बढे सेकेन्ड ह्यान्ड इलेक्ट्रिक कार किन्ने बेलायती

बेलायतमा गत वर्ष भन्दा सेकेन्ड ह्यान्ड इलेक्ट्रिक कार किन्ने व्यक्तिहरुको संख्या दोब्बर भएको छ । सोसाइटी अफ मोटर म्यानुफ्याक्चरर्स एन्ड ट्रेडर्स (एसएमएमटी) का अनुसार पहिलो तीन महिनामा गत वर्ष ६ हजार ६ सय गाडीको कारोबार भएकोमा यो वर्षको पहिलो तीन महिनामा १४ हजार ६ सय गाडीको कारोबार भएको छ । यो भनेको करिब १२० प्रतिशत बढी हो ।

गत वर्षको कोरोना महामारी र चिप अभावको कारण नयाँ कार पाउन समस्या हुनुका साथै मानिसहरुले सहज तरिकाले पाइने सेकेन्ड ह्यान्ड गाडीतिर आकर्षित भएको भनाइ छ ।

यद्यपि यस्ता सेकेन्ड ह्यान्ड इलेक्ट्रिक सवारी साधनको कमी छ र आगामी दिनमा पनि कमी नै हुने अनुमान गरिएको छ ।

गत वर्षको तुलनामा यस्ता कारको बिक्री ५.१ प्रतिशतले बढेर १७ लाख पुगेको भए पनि प्यान्डेमिक भन्दा पहिले सन् २०१९ को तुलनामा भने अझै पनि कमी नै छ ।

युज्ड कार सम्बन्धी वेबसाइट अटो ट्रेडरले प्रकाशित गरेको छुट्टै तथ्यांकमा २०२० अप्रिलमा यस्ता कारको मूल्य १३ हजार ९ सय पाउन्ड भएकोमा २०२२ अप्रिलमा १७ हजार ४ सय पाउन्ड पुगेको बताइएको छ । यो अवधिमा मास मार्केट सेकेन्ड ह्यान्ड गाडीको मूल्य १८ हजार ५ सयबाट २५ हजार ८ सय पाउन्ड पुगेको बताइएको छ ।

बेलायतका धेरै स्थानमा पेट्रोलियम सवारी साधन चलाउन प्रतिबन्ध छ । त्यसैगरी पुरै देशमा सन् २०३० देखि पेट्रोलियम र २०३५ देखि हाइब्रिड कार चलाउनमा प्रतिबन्ध लगाउने तयारी भइरहेको छ । यसको कारण पनि नयाँ वा सेकेन्ड ह्यान्ड कार किन्नेहरु बेलायतमा बढिरहेको बताइएको छ ।