नेपालमा बिक्री शुरु हुन लागेको स्कर्पियो एनले पायो फाइभ स्टार रेटिङ

महिन्द्राको चर्चित एसयूभी स्कर्पियो एनले सेफ्टि टेष्टमा फाइभ स्टार रेटिङ हात पारेको छ । ग्लोवल एनक्यापको नयाँ प्रोटोकलमा आधारित उक्त टेष्टमा यो नयाँ एसयूभीले एडल्ट अकुपेन्ट प्रोटेक्सनमा सो रेटिङ पाएको हो । चाइल्ड अकुपेन्सि टेष्टमा भने यसले जम्मा थ्री स्टार रेटिङ पाएको छ ।

६ महिनाअघि नेपाली बजारमा सार्वजनिक भएको यो एसयूभीको बिक्री नेपाल सरकारले लगाएको आयत प्रतिवन्धका कारण हुन सकिरहेको थिएन । पुष १ गतेबाट सो प्रतिवन्ध हट्ने निर्णय भएसंगै अवको केही समयपछि यसको बिक्री शुरु हुने आँकलन गरिएको छ ।

नयाँ डिजाइन थिममा तयार भएको स्कर्पियो एनमा कम्पनीले ट्विन पिक लोगो दिएको छ । कारको एक्सटेरियरमा प्रोजेक्टर हेडल्याम्प, एलईडी डेटाइम रनिङ लाइट, क्रोम गार्निश गरिएको ठाडो स्ल्यान्टेड फ्रन्ट ग्रिलको साथ पूर्ण रूपमा नयाँ फ्रन्ट उपलब्ध गराइएको छ ।

यो एसयूभीको फ्रन्टको बम्परलाई फग ल्याम्प हाउजिङको वरिपरि ठूलो एयर इन्टेक र सी–आकारको क्रोम ट्रिमको साथ अपडेट गरिएको छ । साथै स्पोर्टी एलोय ह्विल र रिफ्रेस गरिएको रियर प्रोफाइल पनि समावेश गरिएको छ ।

यसमा क्रुज कन्ट्रोल र माउन्टेड कन्ट्रोल जस्ता अन्य फिचरको साथ अपडेट गरिएको फ्ल्याट–बटम स्टेयरिङ ह्विल दिइएको छ । स्कोर्पियो–एन एसयूभीको इन्टेरियरमा नयाँ अपहोल्स्ट्री, ड्युअल टोन थिम, ३६० डिग्री क्यामेरा, ड्युअल जोन क्लाइमेट कन्ट्रोल र कनेक्टेड कार टेक्नोलोजी जस्ता फिचर सामेल गरिएका छन् ।

स्कोर्पियो–एनको क्याबिनमा दोस्रो पंक्तिको सिट व्यवस्था छ, जसमा क्याप्टेन सिट आर्म रेष्टसहित उपलब्ध छ । यो एसयूभी २.० लिटर पेट्रोल र २.२ लिटर डिजेल इन्जिनमा उपलब्ध रहेको छ ।