आगामी चैतभित्रै साझाका ३ विद्युतीय बस नेपाल भित्रिदै

काठमाडौं - साझा यातायातका बन्दै गरेका ४० बसमध्ये तीन बस आगामी चैत महीनाभित्र नेपाल आइसक्ने भएका छन् ।

पहिलो चरणमा तीन वटा विद्युतीय बस आउन लागेका हुन् । साझाका बिजुली बस चीनको नयान्जिंगस्थित कारखानामा तयारीको क्रममा रहेको साझा यातायात सहकारी संस्थाका अध्यक्ष कनकमणि दीक्षितले बताएका छन् ।

हाल तीन वटा विद्युतीय बस आउने र उपत्यकाका सडक र रूटमा परीक्षण सफल भएपछि बाँकी ३७ वटा बस आउने उनले जानकारी दिएका छन् ।

साझा यातायातले ४० वटा विद्युतीय बस खरीद गर्न लागेको हो । दीक्षितले सामाजिक सञ्जाल फेसबुकमा तयारी अवस्थामा रहेको बसको फोटो सार्वजनिक गर्दै यसबारे जानकारी दिएका हुन् ।

‘बिजुली यातायात शुरू गर्न हामी प्रतीक्षामा छौं । लुम्बिनी बिकास कोषले मगाएको तीन वटा बिजुली बस सम्झौतामा साझा यातायातले चलाउन लागेको थियो । तीन वर्षअघि, उद्घाटन पनि भयो, तर बस आयात कागजातको कारण बस सडकमा ल्याउने अनुमति मिल्न गएन । बिजुली परिवहनको शुरुवात भनेर तामझामका साथ उदघान गरेका थियौं त्यति बेला, तर अड्को आइलाग्यो । यसपाली साझाको आफ्नै बस आउँदैछन्, उत्साहित छौं !’, दीक्षितले लेखेका छन् ।

साझा यातायातले विगत तीन वर्षदेखि विद्युतीय बस खरीद प्रक्रिया अगाडि बढाएको भएपनि सरकारले समर्थन नगर्दा ढिलाई हुँदै आएको थियो । गत वर्ष ३०० वटा बिद्युतीय बस खरीद गर्न साझालाई सरकारले ३ अर्ब रुपैयाँ उपलब्ध गराएको थियो ।

तर, सो रकम फिर्ता लगेर पुनः साझा यातायातलाई नै फर्काएपछि विद्युतीय बस खरीद प्रक्रिया अघि बढेको थियो ।

नेपाल आउन तयारी भएका विद्युतीय बस २५ सिटभन्दा माथिका हुने छन् ।