राइड सेयरिङलाई लक्षित गरी नयाँ इलेक्ट्रिक स्कुटर नेपाल आउँदै, मूल्य कति ?

काठमाडौं–नेपाली बजारमा अवको केही दिनपछि अर्को नयाँ ब्रान्डको इलेक्ट्रिक स्कुटर भित्रिने भएको छ । चिनियाँ इलेक्ट्रिक टु ह्विलर ब्रान्ड साइगको राइडर भी११ स्कुटर साइग नेपाल प्रालिले भित्र्याउन लागेको हो ।

पठाओ र इन्ड्राइभ जस्ता राइड सेयरिङ प्लेटफर्मलाई लक्षित गरी नयाँ स्कुटर ल्याउन लागिएको र यसको मूल्य २ लाख ७० हजार हाराहारी पर्ने कम्पनीको भनाई छ । कम्पनीले सुरुमा काठमाडौं सहित सिन्धुली र विरगंजबाट यसको बिक्री थाल्ने योजना बनाएको छ । लगत्तै चितवन, जनकपुर, धनगढी, बर्दिबास र लालवन्दिमा समेत शोरुम विस्तार गरिनेछ ।

राइडर भी११ मा ७२ भोल्ट ५५ एम्पियर आवर क्षमताको लिथियम आइरन फस्फेट ब्याट्री जडान गरिएको हुनेछ । यसैगरी, यसको मोटर क्षमता ३ हजार ६८१ वाट हुनेछ भने स्कुटरलाई एकपटक फुल चार्ज गरेपछि १५० किलोमिटरसम्म यात्रा गर्न सकिने दाबी गरिएको छ ।

स्कुटरको दुबै चक्कामा डिस्क ब्रेक जडान गरिएको छ । राइडर भी११ लाई ७० किलोमिटर प्रतिघन्टाको उच्चतम गतिमा हाँक्न सकिने बताइएको छ । कम्पनीले यसको ब्याट्रीमा २ वर्षको ग्यारेन्टि र १ वर्षको वारेन्टि तथा मोटर र कन्ट्रोलरमा २ वर्षको वारेन्टि प्रदान गर्ने बताएको छ ।