कारको क्रयास टेस्टमा सेफ्टी रेटिङ कसरी गरिन्छ ? के फाइदा छ ?

कार किन्दा अन्य फिचरमा बाहेक कारको सेफ्टीमा विशेष ध्यान दिनु पर्छ । विश्वमा कार दुर्घटनामा लाखौ मानिसको मृत्यु हुने गरेको छ । तर, कारमा सेफ्टी फिचर सुधार हुँदै गएपछि सडक दुर्घटनामा ज्यान गुमाउनेको संख्या घट्दै गएको छ ।

अहिले अधिकांश कार खरिदकर्ताले कारको क्रयास टेस्टिङबारे थाहा पाउन थालेका छन् । कुनै पनि कारको सेफ्टीको अनुमान कार क्रयास र सेफ्टी रेटिङमा निर्भर हुन्छ । ग्लोबल न्यू कार एसेसमेन्ट प्रोग्राम (एनसीएपी) द्वारा कारको क्रयास टेस्ट गरेर रेटिङ दिने गरिन्छ । सोही परीक्षणद्वारा कारको सेफ्टीको बारेमा थाहा हुन्छ । सो सेफ्टी वयस्क र बालबालिका दुवैको लागि फरक हुन्छ ।

सेफ्टी रेटिङको अर्थ
एनसीएपीले प्रायः सबै कम्पनीका गाडीको क्रयास टेस्टिङ गर्छ । सबै कम्पनीहरूले आफ्नो कारको प्रत्येक मोडल र भेरिएन्टमा विभिन्न सेफ्टी फिचर प्रदान गरेका हुन्छन् । यसमा एयरब्याग, एबीएस, ईबीडी, सेफ्टी बेल्ट, ब्याक सेन्सर, क्यामेरा, स्पिड अलर्ट जस्ता फिचरहरू समावेश छन् । जब कार सेफ्टी परीक्षण गरिन्छ, यो सेफ्टी फिचरको आधारमा रेटिङ गरिन्छ ।

सेफ्टी रेटिङ प्रक्रिया
कारको सेफ्टी रेटिङका लागि दुर्घटना परीक्षण गरिन्छ । यसका लागि मानव जस्तो डमी प्रयोग गरिन्छ । परीक्षणको क्रममा, गाडीलाई निश्चित गतिमा कडा वस्तुसँग ठोकिन्छ । यसको लागि कारमा ४ देखि ५ वटा डमी प्रयोग गरिन्छ । कारको पछाडि बच्चाको डमी राखिन्छ । यो चाइल्ड सेफ्टीमा निश्चित गरिन्छ ।

सेफ्टी रेटिङले सुरक्षित कार किन्न मद्दत गर्छ
क्रयास टेस्टपछि कारको एयरब्यागले काम गरेको वा नगरेको र डमीलाई कति क्षति भयो ? कारका अन्य सेफ्टी फिचरले कत्तिको राम्रोसँग काम गरे ? भन्ने सबैको आधारमा रेटिङ दिइएको हुन्छ । यो रेटिङले ग्राहकलाई सुरक्षित कार किन्न मद्दत गर्छ । यद्यपि कारको सबै भेरिएन्टको क्रयास परीक्षण गरिदैन ।