रोयल इन्फिल्डको नयाँ गोआन क्लासिक ३५० लन्च

रोयल इन्फिल्डले नयाँ गोआन क्लासिक ३५० मोटरसाइकल भारतीय बजारमा लन्च गरेको छ । सो बाइकको प्रारम्भिक मूल्य २ लाख ३५ हजार भारु राखिएको छ ।

सो बाइकलाई सिंगल टोन र ड्युअल टोन पेन्ट विकल्पमा प्रस्तुत गरिएको छ, जसमा ड्युअल टोन भेरिएन्टको मूल्य २ लाख ३८ हजार भारु छ। नयाँ गोआन क्लासिक रोयल इन्फिल्ड क्लासिक ३५० मा आधारित रहेको भनिएको छ तर यसमा धेरै परिवर्तन गरिएको छ जसले यसलाई थप प्रिमियम र आकर्षक बनाएको छ ।

बाइकको ट्याङ्की, साइड बक्स, फेन्डर र हेडलाइट हाउसिङ क्लासिक ३५० जस्तै छ । यद्यपि, यसको एलईडी हेडलाइट, राउन्ड टेल ल्याम्प, एप-ह्याङ्गर ह्यान्डलबार र फर्वार्ड-सेट फुटपेगले यसलाई छुट्टै पहिचान दिइएको छ ।

बाइकमा १९ इन्च फ्रन्ट र १६ इन्च रियर स्पोक ह्विल छ । साथै, दुबै पाङ्ग्रामा डिस्क ब्रेक र ड्युअल च्यानल एबीएस रहेको छ । गोआन क्लासिकमा रेगुलर टेलिस्कोपिक फ्रन्ट फोर्क र रियर ड्युअल शर्क एब्जर्बर दिइएको छ । यसको फिचरमा एलईडी लाइटिङ, सेमी-डिजिटल इन्स्ट्रयुमेन्ट क्लस्टर, एडजस्टेबल लिभर र रोयल इन्फिल्डको ट्रिपर नेभिगेसन सिस्टम समावेश छ ।

रोयल इन्फिल्ड गोआन क्लासिक ३५० मा ३४९ सीसी जे सिरिजको सिंगल सिलिन्डर एयर कुल्ड इन्जिनले सुसज्जित गरेको छ, जसले २० एचपीको पावर र २७ एनएमको टर्क जेनेरेट गर्छ । ट्रान्समिसनका लागि इन्जिनलाई ५ स्पिड गियरबक्ससँग ट्युन गरिएको छ । बाइकको सिट उचाइ मात्र ७५० एमएम छ, जसले यसलाई छोटो राइडरका लागि पनि उपयुक्त बनाउँछ।

रोयल इन्फिल्ड गोआन क्लासिक ३५० ले जावा पेराकसँग प्रतिस्पर्धा गर्नेछ । साथै सो बाइकले जावा र येज्दीका अन्य मोटरसाइकल, रोयल इन्फिल्डका अन्य मोडल र होन्डा सीबी रेन्जसँग पनि प्रतिस्पर्धा गर्नेछ ।