प्रतिस्पर्धीले मूल्य बढाएपछि रोयल इन्फिल्डलाई झनै सजिलो, उही सेग्मेन्ट तर मूल्यमा लाखौ फरक

आगामी आर्थिक वर्षको बजेटमा सरकारले २०० सीसी भन्दा बढी क्षमताका मोटरसाइकलमा लाग्ने सडक दस्तुर र अन्तःशुल्क कम गरेपछि रोयल इन्फिल्डले सवैभन्दा बढी अन्तरले मूल्य कम ग-यो । नेपाली बजारमा सर्बाधिक बिक्री हुने क्रुजर बाइकका रुपमा परिचित क्लासिक ३५० मा १ लाख ५० हजार रुपैयाँले मूल्य घटाएपछि अहिले यो बाइकको माग धान्न कम्पनीलाई धौधौ नै परेको छ ।

यसैगरी बजेट अघि ९ लाख हराहारीमा आउने अनुमान गरिएको स्क्र्यामको मूल्य समेत आधिकारिक वितरक कम्पनी अल्फा अटोमोटिभले एकदमै प्रतिस्पर्धी कायम ग-यो। ४११ सीसीको स्क्र्यामलाई कम्पनीले ६ लाख ६० हजारमा बिक्री थालेपछि अहिले यो बाइकमा रुचि राख्ने ग्राहकको संख्या समेत बढिरहेको कम्पनीले जनाएको छ ।

विगत लामो समयदेखि क्रुजर सेग्मेन्टमा बजारको नेतृत्व लिन सफल रोयल इन्फिल्डको बजार गति चालु आर्थिक वर्षको बजेटमा भारी मात्राले भन्सार र अन्तःशुल्क वृद्धि भएसँगै कम भएको थियो । यसै वर्षदेखि नयाँ वितरकका रुपमा अल्फा अटोमोटिभले बिक्री थाल्नु र लगत्तै बजेट मार्फत करको दर वृद्धि हुनु तथा लामो समयसम्म आयात प्रतिबन्ध खेप्नु परेका कारण रोयल इन्फिल्डको बजार केही समयका लागि नराम्रोसँग प्रभावित वन्न पुग्यो ।

सो अवधिमा कम्पनीले मोटरसाइकलको बिक्री बढाउन जोड दिनुभन्दा पनि एसेम्बल प्लान्टलाई टुंगोमा पुर्याउने गरी काम ग¥यो । फलस्वरुप जेठ १५ मा बजेट आएलगत्तै कम्पनीले रोयल इन्फिल्डलाई स्वदेशमै एसेम्बल थालिएको भन्दै क्लासिक ३५० को नयाँ मूल्य र स्क्र्याम ४११ को बिक्री शुरु ग-यो । बजेट आउनु अघिसम्म ६ लाख ५० हजारमा बिक्री हुँदै आएको क्लासिक ३५० को मूल्य घटेर ४ लाख ९९ हजार कायम गरिएपछि यसले टु ह्विलर बजारमा एकप्रकारको हलचल नै पैदा गरायो ।

अल्फा अटोमोटिभले मूल्य कम गरेपछि प्रतिस्पर्धी ब्रान्ड होन्डा, जावा, येज्दी र बीएमडब्लु लगायतले पनि मूल्य कम गर्ने अनुमान गरिएको थियो । तर पछिल्लो समय रोयल इन्फिल्डलाई टक्कर दिइरहेको होन्डाले सीबी हाइनेस ३५० र सीबी ३५० आरएसमा ७६ हजारले मूल्य वृद्धि गर्यो । जसअनुसार यी बाइकको नयाँ मूल्य क्रमश ९ लाख २५ हजार र ९ लाख ७५ हजार रुपैयाँ पुगेको छ ।

दुवै बाइकको नयाँ मूल्य सार्वजनिक भएपछि क्लासिक ३५० होन्डा सीबी हाइनेसभन्दा ४ लाख २६ हजार र सीबी ३५० आरएसभन्दा ४ लाख ७६ हजार रुपैयाँले सस्तो बनेको छ । यी दुई बाइकको मूल्यमा अहिले झन्डै आधा वरावरको अन्तर देखिएको छ । दुवै बाइक एउटै सेग्मेन्ट र पावर एवं फिचर समेत लगभग समानजस्तै देखिएका कारण सतप्रतिशत हाराहारी महंगो मूल्य तिरेर होन्डाका यी दुई बाइक खरिद गर्न ग्राहक तत्कालै तयारी भइहाल्ने अवस्था देखिँदैन । जसको सिधा लाभ रोयल इन्फिल्ड क्लासिकलाई पुग्ने निश्चित प्रायः देखिन्छ ।

यसैगरी सोही सेग्मेन्टमा प्रतिस्पर्धा गरिरहेका जावा र येज्दीले पनि मूल्य समायोजन गरिसकेका छैनन् । तीन भेरिएन्टमा उपलब्ध जावाको मूल्य हाल नेपाली बजारमा फोर्टी टुलाई ६ लाख ७३ हजारदेखि ७ लाख ५८ हजारसम्म, क्लासिकको ७ लाख ३६ हजार र पेराकको ८ लाख २० हजार रुपैयाँ कायम गरिएको छ । जुन रोयल इन्फिल्ड क्लासिकको भन्दा ३ लाख २१ हजार रुपैयाँसम्मले वढी हो ।

हालसालै नेपाल भित्रिएको नयाँ ब्रान्ड येज्दीलाई आधिकारिक वितरक अग्नि मोटो ईकंले ९ लाख ४८ हजारदेखि ९ लाख ९६ हजार रुपैयाँसम्ममा बिक्री गर्दै आएको छ । जुन रोयल इन्फिल्ड क्लासिकको तुलनामा दोब्बर सम्मले महंगो देखिएको छ ।