रोयल इनफिल्ड हन्टर ३५० पोखरामा लन्च, टेस्ट राइड र बुकिङ सुरु

पोखरा – रोयल इनफिल्डले आफ्नो लोकप्रिय स्ट्रिट रोड्स्टर हन्टर ३५० पोखरामा लन्च गरेको छ । काठमाडौंमा सफल लन्चपछि कम्पनीले पोखरास्थित शोरुममार्फत टेस्ट राइड र बुकिङ कार्यक्रम सुरु गरेको हो ।

विश्वका शहरी जीवनशैलीबाट प्रेरित रङ, सुधारिएको सस्पेन्सन र सहज एर्गोनोमिक डिजाइनसहितको बिएस६ हन्टर ३५०, २०२५ संस्करण पोखराका शहरी तथा पहाडी सडक दुवैका लागि उपयुक्त हुने कम्पनीको दाबी छ ।

मोटरसाइकलमा स्लिप एसिस्ट क्लच, १६० एमएम ग्राउण्ड क्लियरेन्स, डुअल च्यानल एबिएस, एलईडी हेडल्याम्प, सुधारिएको सीट र ट्रिप नेभिगेटर जस्ता सुविधा समावेश छन् ।

यसमा प्रयोग गरिएको ३४९ जे–सिरिज इन्जिनले दैनिक सवारीमा चुस्ती र आरामदायी अनुभव दिने बताइएको छ । सन् २०२२ देखि हालसम्म विश्वभर ७ लाखभन्दा बढी राइडरले यो मोडेल रोजिसकेका छन् ।

रोयल इनफिल्ड नेपालका निर्देशक मेघराज पौडेलका अनुसार पोखरा जस्तो पर्यटन र एड्भेन्चरले भरिएको सहरका लागि हन्टर ३५० अत्यन्त उपयुक्त मोडेल हो । ‘यस मोटरसाइकलले यहाँको शहरी जीवनशैली र पहाडी सडक दुवैमा सहज र रमाइलो राइडिङ अनुभव दिने विश्वास लिएका छौं । गण्डकी प्रदेशका राइडरहरूसँग अझ नजिकिन पाउँदा हामी उत्साहित छौँ’ उनले भने ।

दुईवटा कलर अप्सनमा उपलब्ध यसको डुअल टोन भेरिएन्टलाई ४ लाख ९९ हजार ९०० र सिंगल टोनलाई ४ लाख ९४ हजार ९०० रुपैयाँ पर्ने बताइएको छ ।

रोयल इनफिल्ड सन् १९०१ देखि उत्पादनमा रहेको संसारकै सबैभन्दा पुरानो मोटरसाइकल ब्रान्डमध्ये एक हो । प्योर मोटरसाइक्लिङ दर्शनका साथ कम्पनीले मध्यम क्षमताका प्रिमियम मोटरसाइकल उत्पादनमा विश्वव्यापी पहिचान बनाएको छ । ब्रान्डका प्रमुख मोडेलहरूमा हन्टर ३५०, क्लासिक ३५०, मेटियर ३५०, हिमालयन ४५० र इन्टरसेप्टर ६५० लगायतका सिरिज समावेश छन् ।

आइसर मोटस लिमिटेड अन्तर्गत सञ्चालन हुने रोयल इनफिल्डले भारतभर २ हजार भन्दा बढी स्टोर तथा विश्वका ६५ भन्दा बढी देशमा सेवा विस्तार गरेको छ । कम्पनीका उत्पादन केन्द्रहरू भारतमा रहेका छन् भने नेपालसहित विभिन्न देशमा सिकेडी एसेम्वली सुविधा सञ्चालनमा छन् ।