प्रतिस्पर्धामा दुई प्रिमियम मोटरसाइकल, हिमालयन ४५० र ४५० एमटीमा कुन किन्ने ?

टु–ह्विलर बजारमा पछिल्लो समय दुई नयाँ एड्भेन्चर मोटरसाइकलको चर्चा चुलिँदो छ । प्रिमियम सेग्मेन्टका सीएफ मोटो एमटी ४५० र रोयल इनफिल्ड हिमालयन ४५० ले एड्भेन्चर बाइक पारखीको ध्यान खिच्न सफल भएका हुन् । यी दुबै मोटरसाइकलमा फिचर लगभग उस्तै भएपनि इन्जिन, पावर, पर्फमेन्स र मुल्यमा भने फरक छ । ४५० सीसी सेग्मेन्टमा अहिले यी दुई मोडलविच रोचक प्रतिस्पर्धा भैरहेको छ ।।

हिमालयन ४५० नेपालमा नै एसेम्बल गरिएको मोडल हो । यसमा ४५२ सीसीको नयाँ शेर्पा इन्जिन जडान गरिएको छ । रोयल इन्फिल्डले पहिलोपटक लिक्विड कुल्ड इन्जिन प्रयोग गरेका कारण पनि हिमालयन ४५० विशेष मानिन्छ । यो मोटरसाइकलमा जडान गरिएको इन्जिनले अधिकतम ४०.२ पीएस पावर तथा ४० एनएमको टर्क जेनेरेट गर्छ । यसको टप स्पीड १८० किलोमिटर प्रतिघण्टा रहेको छ ।

चिनियाँ टु–ह्विलर निर्माता सीएफ मोटोले उत्पादन गरेको एमटी ४५० अत्याधुनिक फिचर र टेक्नोलोजी मिश्रित प्रिमियम एड्भेन्चर मोटरसाइकल हो । यो नयाँ मोटरसाइकल अहिले प्रिमियम बाइक पराखीमाझ लोकप्रिय बनिरहेको छ । एमटी ४५० एड्भेन्चरमा ४४९ सीसी क्षमताको ट्वीन सिलिन्डर इन्जिन जडान गरिएको छ । जसले ४३.६ हर्षपावर तथा ४४ एनएमको टर्क जेनेरेट गर्छ । एमटी ४५० को टप स्पीड १९० किलोमिटर प्रतिघण्टा रहेको छ । यी दुबै मोटरसाइकलमा ६ स्पीडको गियरबक्स पाउन सकिन्छ ।

फिचरको कुरा गर्नपर्दा हिमालयन ४५० मा परै एलइडी लाइट, टिजिटल टीएफटी राउन्ड कन्सोल, कनेक्टिभिटी सिस्टम, टर्न वाइ टर्न नेभिगेशन, मल्टिपल राइड मोड उपलब्ध छ । साथै, स्वीचएवल डबल च्यानल एबीएस, ट्युब टायर, अफरोड स्पोक ह्वील, स्लीपर एसिस्ट क्लच, यूएसडी र मोनोशक सस्पेन्सन, यूएसबी चार्जिङ पोर्ट, वीन्डस्क्रीन, फ्रन्ट फेन्डर र रेडियटर कभर छन् ।

त्यसैगरी, सीएफ मोटो एमटी ४५० मा पनि पुरै एलइडी लाइट, ट्रयाक्सन कन्ट्रोल, कनेक्टिभिटी सिस्टम, नेभिगेसन, नेक्स्ट जेन डिजिटल टिएफटी डिस्प्ले, स्लीपर क्लच, डबल च्यानल स्विचेवल एबीएस, स्पोक ह्वील दिइएको छ । साथै, यूएसबी पोर्ट, एडजष्टेवल यूएसडी फर्क र मोनोसक सस्पेन्सन, एड्जष्टेवल सिट जस्ता फिचर पाउन सकिन्छ ।

चार कलर अप्सनमा उपलब्ध हिमालयन ४५० को मुल्य ९ लाख ८९ हजार ५०० देखी १० लाख ३९ हजार ५०० रुपैयाँसम्म निर्धारण गरिएको छ भने एउटा भेरिएन्टमा मात्रै उपलब्ध एमटी ४५० लाई १२ लाख ५० हजार रुपैयाँ पर्छ ।